ກະຊວງພາຍໃນ

Ministry of Home Affairs

ກະຊວງພາຍໃນ ມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ມອບໃບຍ້ອງຍໍບຸກຄົນດີເດັ່ນ ປະຈໍາປີ 2018

1 min read

ເພື່ອເປັນການຍ້ອງຍໍສັນລະເສີນ ແລະ ເພື່ອເປັນການຢັ້ງຢືນບຸກຄົນທີ່ຕັ້ງໜ້າປະກອບສ່ວນເຂົ້າໃນການປະຕິບັດວຽກງານຢ່າງຫ້າວຫັນ ພ້ອມທັງເປັນການສົ່ງເສີມໃຫ້ຄະນະພັກ-ຄະນະນໍາແຕ່ລະຂັ້ນ ຕະຫຼອດຮອດສະມາຊິກພັກ ແລະ ພະນັກງານ-ລັດຖະກອນ ມີຄວາມເອົາໃຈໃສ່ໃນການຊີ້ນໍາ-ນໍາພາ, ເປັນແບບຢ່າງນໍາໜ້າ, ມີຫົວຄິດປະດິດສ້າງ, ມີຄວາມຮັບຜິດຊອບສູງໃນການຊີ້ນໍາ-ນໍາພາ ແລະ ປະຕິບັດວຽກງານການຈັດຕັ້ງ, ໃນວັນທີ 05 ກໍລະກົດ 2019 ກະຊວງພາຍໃນ ໄດ້ຈັດພິທີມອບ-ຮັບ ໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ໃບຍ້ອງຍໍບຸກຄົນດີເດັ່ນ ປະຈໍາປີ 2018 ຂຶ້ນ ໂດຍການເປັນປະທານຂອງທ່ານ ຄໍາໝັ້ນ ສູນວິເລີດ ກໍາມະການສູນກາງພັກ ເລຂາຄະນະພັກ ລັດຖະມົນຕີກະຊວງພາຍໃນ, ມີບັນດາຄະນະປະຈໍາພັກ, ຄະນະພັກກະຊວງ, ຄະນະຫ້ອງການ, ບັນດາກົມ, ສະຖາບັນ ແລະ ສູນ ພ້ອມດ້ວຍພະນັກງານທີ່ໄດ້ຮັບຄັດເລືອກເປັນບຸກຄົນດີເດັ່ນ ປະຈໍາປີ 2018 ເຂົ້າຮ່ວມ.

ທ່ານ ຄໍາໝັ້ນ ສູນວິເລີດ ກໍາມະການສູນກາງພັກ ເລຂາຄະນະພັກກະຊວງ ລັດຖະມົນຕີກະຊວງພາຍໃນ ໄດ້ໂອ້ລົມຕໍ່ໜ່ວຍພັກທີ່ໄດ້ຮັບໃບຢັ້ງຢືນ ແລະ ສະມາຊິກພັກ, ພະນັກງານ-ລັດຖະກອນທີ່ໄດ້ຮັບໃບຍ້ອງຍໍວ່າ: ການກໍ່ສ້າງ  ໜ່ວຍພັກປອດໃສ, ເຂັ້ມແຂງ, ໜັກແໜ້ນ ເປັນວຽກງານທີ່ສໍາຄັນໃນການຍົກສູງຄຸນນະພາບຂອງໜ່ວຍພັກ ແລະ ສະມາຊິກພັກໃຫ້ເປັນແກ່ນນໍາທີ່ເຂັ້ມແຂງໃນລະບົບການເມືອງຢູ່ຮາກຖານ, ການມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນນີ້ໄດ້ສ່ອງແສງໃຫ້ເຫັນເຖິງຄວາມເອົາໃຈໃສ່ໃນການຊີ້ນໍາ-ນໍາພາ, ເປັນແບບຢ່າງນໍາໜ້າ, ມີຫົວຄິດປະດິດສ້າງ, ມີຄວາມຮັບຜິດຊອບສູງ ແລະ ມີຄວາມສາມັກຄີເປັນເອກະພາບກັນຂອງຄະນະພັກ-ຄະນະນໍາແຕ່ລະຂັ້ນ, ບັນດາສະມາຊິກພັກ ແລະ ພະນັກງານ-ລັດຖະກອນ ໄດ້ພ້ອມພຽງກັນຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ I ຂອງອົງຄະນະພັກກະຊວງ, ມະຕິກອງປະຊຸມຂອງບັນດາໜ່ວຍພັກ ແລະ ໜ້າທີ່ວິຊາສະເພາະຂອງແຕ່ລະສະຫາຍຢ່າງຕັ້ງໜ້າ ເຮັດໃຫ້ກະຊວງພາຍໃນເປັນເສນາທິການໃຫ້ແກ່ລັດຖະບານກ່ຽວກັບວຽກງານຄຸ້ມຄອງບໍລິຫານລັດໄດ້ເປັນຢ່າງດີ.

ສໍາລັບວຽກງານຍ້ອງຍໍ ກໍເປັນວຽກງານທີ່ສໍາຄັນໃນການກະຕຸກຊຸກຍູ້ ໃຫ້ພະນັກງານ-ລັດຖະກອນ ຍົກສູງສະຕິຕື່ນຕົວ, ມີນໍ້າໃຈບຸກບື່ນ ແລະ ດຸໝັ້ນ ໃນການປະຕິບັດໜ້າທີ່ວຽກງານທີ່ໄດ້ຮັບມອບໝາຍ, ແລະ ໄດ້ອຸທິດສະຕິປັນຍາ ແລະ ເຫື່ອແຮງຂອງຕົນ ໃຫ້ແກ່ພາລະກິດປົກປັກຮັກສາ ແລະ ພັດທະນາປະເທດຊາດ; ເຊິ່ງໜ່ວຍພັກທີ່ໄດ້ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ມີຈໍານວນ 10 ໜ່ວຍ ແລະ ມີພະນັກງານ-ລັດຖະກອນທີ່ໄດ້ຮັບຄັດເລືອກເປັນບຸກຄົນດີເດັ່ນ ປະຈໍາປີ 2018 ລວມທັງໝົດ 185 ທ່ານ, ຍິງ 73 ທ່ານ.

Leave a Reply

Your email address will not be published. Required fields are marked *