ກະຊວງພາຍໃນ

Ministry of Home Affairs

ພິທີເຊັນບົດບັນທຶກກ່ຽວກັບການກໍ່ສ້າງປັກຫລັກໝາຍເຂດແດນເຊື່ອມຕໍ່ ລະຫວ່າງແຂວງອຸດົມໄຊ ແລະ ຜົ້ງສາລີ

5 min read

ໃນ​ຕອນ​ເຊົ້າ​ຂອ​ງວັນ​ທີ 28 ມິຖຸນາ 2019 ທີ່ຫໍປະຊຸມແຫ່ງຊາດ ໄດ້ມີພິທີເຊັນບົດບັນທຶກກ່ຽວກັບການກໍ່ສ້າງປັກຫຼັກ  ໝາຍເຂດແດນເຊື່ອມຕໍ່ລະຫວ່າງແຂວງອຸດົມໄຊ ແລະ ແຂວງຜົ້ງສາລີ ໂດຍການເຊັນບົດບັນທຶກລະຫ່ວາງ ທ່ານ ຄຳພັນ ເຜີຍຍະວົງ ເຈົ້າແຂວງ ແຂວງອຸດົມໄຊ, ທ່ານ ຄຳເຈນ ວົງໂພສີ ເຈົ້າແຂວງ ແຂວງຜົ້ງສາລີ, ທ່ານ ຄຳໝັ້ນ ສູນວິເລີດ ລັດຖະມົນຕີ ກະຊວງພາຍໃນ ເຊິ່ງມີພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

ການເຊັນບົດບັນທຶກໃນຄັ້ງນີ້ ແມ່ນສືບເນື່ອງມາຈາກຜົນຂອງກອງປະຊຸມກ່ຽວກັບການປັກຫຼັກໝາຍເຂດແດນເຊື່ອມຕໍ່ລະ ຫວ່າງແຂວງອຸດົມໄຊ ແລະ ແຂວງຜົ້ງສາລີ ທີ່ຈັດຂຶ້ນໃນວັນທີ 13 ທັນວາ 2018 ທີ່ເມືອງຂວາ ແຂວງຜົ້ງສາລີ ໂດຍອີງຕາມເນື້ອໃນຂອງກອງປະຊຸມແມ່ນເຫັນດີເປັນເອກະພາບກັນ ຈັດຕັ້ງປະຕິບັດວຽກງານສຳຫຼວດວັດແທກ, ເກັບກໍາຂໍ້ມູນ ແລະ ກໍ່ສ້າງຫຼັກ    ໝາຍເຂດແດນເຊື່ອມຕໍ່ລະຫວ່າງ ແຂວງອຸດົມໄຊ ກັບ ແຂວງຜົ້ງສາລີ ຈຳນວນ 10 ຫຼັກໝາຍ ເລີ່ມແຕ່ວັນທີ 22 ພະຈິກ- 10 ທັນວາ 2018.

ເຊິ່ງເນື້ອໃນບົດບັນທຶກສະບັບນີ້ ແມ່ນໄດ້ກຳນົດລະອຽດກ່ຽວກັບຫຼັກໝາຍ ແລະ ທິດເນັ່ງຂອງເສັ້ນເຂດແດນເຊື່ອມຕໍ່ລະຫວ່າງ ແຂວງອຸດົມໄຊ ກັບ ແຂວງຜົ້ງສາລີ ໂດຍເລີ່ມຈາກຊາຍແດນລະຫວ່າງ ລາວ-ຈີນ ໄປຕາມເສັ້ນເຂດແດນເຊື່ອມຕໍ່ເກົ່າປີ 1999 ຈົນເຖິງຫຼັກໝາຍເລກທີ 01 ຈົນຮອດຫຼັກໝາຍທີ 10 ທີ່ຕິດກັບຫຼັກກິໂລແມັດທີ 52 ເສັ້ນທາງເລກທີ 2 E ເລາະລົງຕາມນໍ້າພາກຮອດຈຸດພິກັດໃນແຜນທີ່ ທີ່ໄດ້ກຳນົດໄວ້ ແລະ ຂຶ້ນໄປຕາມເສັ້ນເຂດແດນເຊື່ອມຕໍ່ເກົ່າປີ 1999 ຈົນຮອດເສັ້ນເຂດແດນເຊື່ອມຕໍ່ລະຫວ່າງ 3 ແຂວງຕິດຈອດກັນຄື: ແຂວງອຸດົມໄຊ, ແຂວງຜົ້ງສາລີ ແລະ ແຂວງຫຼວງນໍ້າທາ, ນອກນັ້ນທັງສາມພາກສ່ວນຍັງໄດ້ກຳນົດມາດຕະຖານຂອງການກໍ່ສ້າງຫຼັກໝາຍເຂດແດນເຊື່ອມຕໍ່ ແລະ ການຄຸ້ມຄອງປົກປັກຮັກສາຫຼັກໝາຍ ແລະ ເຂດແດນເຊື່ອມຕໍ່ຮ່ວມກັນຕື່ມອີກ.

Leave a Reply

Your email address will not be published. Required fields are marked *