ກະຊວງພາຍໃນ

Ministry of Home Affairs

ທ່ານ ລັດຖະມົນຕີ ກະຊວງພາຍໃນ ລົງເຄື່ອນໄຫວຊຸກຍູ້ວຽກງານ ຂະແໜງພາຍໃນ ແຂວງອັດຕະປື

1 min read

ວັນທີ  5 ສິງຫາ 2019 ທ່ານ ຄຳໝັ້ນ ສູນວິເລີດ ລັດຖະມົນຕີກະຊວງພາຍໃນ ພ້ອມຄະນະ ໄດ້ລົງຊຸກຍູ້ ການເຄື່ອນໄຫວວຽກງານ ຂະແໜງພາຍໃນ ຢູ່ເມືອງສະໜາມໄຊ ແຂວງອັດຕະປື ໂດຍໄດ້ຮັບການຕ້ອນຮັບຂອງ ທ່ານ ນາງ ມະນີລາ ໄຊສົມບູນ ຮອງເຈົ້າເມືອງ  ເມືອງສະໜາມໄຊ ພ້ອມດ້ວຍຄະນະພະແນກພາຍໃນແຂວງ ຫ້ອງການພາຍໃນເມືອງ ແລະ ຂະແໜງການທີ່ກ່ຽວຂ້ອງ.

ການລົງເຄື່ອນໄຫວຊຸກຍູ້ວຽກງານໃນຄັ້ງນີ້ ທ່ານລັດຖະມົນຕີກະຊວງພາຍໃນ ພ້ອມຄະນະ ໄດ້ຮັບຟັງການລາຍງານກ່ຽວກັບສະພາບການ ແລະ ຂໍ້ຍຸ້ງຍາກໃນການໃຫ້ຄວາມຊ່ວຍເຫຼືອດ້ານຕ່າງໆແກ່ຄອບຄົວປະຊາຊົນ ທີ່ໄດ້ຮັບຜົນກະທົບ ຈາກເຂື່ອນໄຟຟ້າເຊປຽນ ເຊນໍ້ານ້ອຍແຕກ ໃນຄັ້ງວັນທີ່ 24 ກໍລະກົດ 2018 ທີ່ຜ່ານມາ ແລະ ຮັບຟັງການລາຍງານການຈັດຕັ້ງບັດປະຕິບັດວຽກງານ ຂະແໜງພາຍໃນ ຈາກ ທ່ານ ທອງແສນ ເດດເຮືອງສາ ຫົວໜ້າຫ້ອງການພາຍໃນເມືອງສະໜາມໄຊ ໂດຍໄດ້ຍົກໃຫ້ເຫັນຜົນສຳເລັດການຈັດຕັ້ງປະຕິບັດ ແລະ ຜັນຂະຫຍາຍບັນດານິຕິກຳຕ່າງໆ ຂອງກະຊວງພາຍໃນ ໄດ້ວາງອອກ ເປັນຕົ້ນ: ວຽກງານຄຸ້ມຄອງພົນລະເມືອງ, ວຽກງານການປົກຄອງຂັ້ນບ້ານ, ວຽກງານສາມສ້າງ, ວຽກງານເຂດແດນເຊື່ອມຕໍ່ລະຫວ່າງ ລາວ ກຳປູເຈຍ ເຂດແດນເຊື່ອມຕໍ່ແຂວງກັບແຂວງ ເມືອງກັບເມືອງ ແລະ ວຽກງານການຄຸ້ມຄອງສາສະໜາ.

ໃນໂອກາດລົງເຄື່ອນໄຫວຊຸກຍູ້ວຽກງານຄັ້ງນີ້ ທ່ານລັດຖະມົນຕີກະຊວງພາຍໃນ ໄດ້ມອບເງິນຊ່ວຍເຫຼືອໃຫ້ແກ່ອໍານາດການປົກຄອງເມືອງສະໜາມໄຊ ຈໍານວນ 20 ລ້ານກີບ ໂດຍຕາງໜ້າຮັບຂອງ ທ່ານ ນາງ ມະນີລາ ໄຊສົມບູນ ຮອງເຈົ້າເມືອງສະຫນາມໄຊ. ຈາກນັ້ນ ທ່ານ ສິງທະວອນ ດາລາວົງ ຫົວໜ້າຫ້ອງການກະຊວງພາຍໃນ ໄດ້ຕາງໜ້າໃຫ້ຄະນະພັກ ຄະນະນໍາ ກໍຄື ພະນັກງານ-ລັດຖະກອນ ກະຊວງພາຍໃນ ມອບເງິນສົດຈໍານວນ 5 ລ້ານກີບ ແລະ ຄອມພິວເຕີ ຈຳນວນ 1 ຊຸດ ລວມມູນຄາທັງໝົດ 9 ລ້ານກວ່າກີບ ໃຫ້ຫ້ອງການພາຍໃນເມືອງສະໜາມໄຊ ໂດຍທ່ານ ທອງແສນ ເດດເຮືອງສາ ຫົວຫນ້າຫ້ອງການພາຍໃນເມືອງ ເປັນຜູ້ຕາງຫນ້າຮັບ ພ້ອມທັງສະແດງຄວາມຂອບໃຈຢ່າງສູງຕໍ່ການນໍາພັກ-ລັດ ກໍ່ຄື ການຊີ້ນຳ-ນຳພາ ແລະ ການລົງຊຸກຍູ້ວຽກງານຢ່າງໃກ້ຊິດຕິດແທດ ຂອງການນໍາກະຊວງພາຍໃນ.

ນອກຈາກນີ້, ທ່ານລັດຖະມົນຕີ ພ້ອມຄະນະ ໄດ້ລົງຢ້ຽມຢາມບ້ານສາມສ້າງຂອງເມືອງສະໜາມໄຊ ແລະສະພາບຄວາມເສຍຫາຍຂອງບ້ານເຮືອນປະຊາຊົນ ກໍ່ຄື ພື້ນທີ່ເຮັດການຜະລິດ ທີ່ໄດ້ຮັບຜົນກະທົບຈາກເຂື່ອນໄຟຟ້າເຊປຽນ ເຊນໍ້ານ້ອຍແຕກ ໃນໄລຍະຜ່ານມາຕື່ມອີກ.

Leave a Reply

Your email address will not be published. Required fields are marked *