ກະຊວງພາຍໃນ

Ministry of Home Affairs

ກະຊວງພາຍໃນ ຍົກລະດັບວຽກງານຈັດຕັ້ງ, ກໍ່ສ້າງພັກ-ພະນັກງານ ໃຫ້ພະນັກງານຫຼັກແຫຼ່ງ

ເພື່ອເຮັດໃຫ້ການຈັດຕັ້ງປະຕິບັດວຽກງານຈັດຕັ້ງ, ກໍ່ສ້າງພັກ-ພະນັກງານ ຢູ່ບັນດາກົມ, ຫ້ອງການ, ສະຖາບັນ ແລະ ສູນ ທີ່ສັງກັດກະຊວງພາຍໃນ ໄດ້ຮັບການຈັດຕັ້ງປະຕິບັດຢ່າງຕໍ່ເນື່ອງ ຮັບປະກັນທາງດ້ານຄຸນນະພາບ ແລະ ສອດຄ່ອງກັບສະພາບການປ່ຽນແປງທາງດ້ານເສດຖະກິດ, ວັດທະນະທໍາ ແລະ ສັງຄົມໃນໄລຍະໃໝ່, ກະຊວງພາຍໃນ ໄດ້ຈັດບັ້ນຝຶກອົບຮົມວຽກງານຈັດຕັ້ງ, ກໍ່ສ້າງພັກ-ພະນັກງານ ໃຫ້ແກ່ພະນັກງານຫຼັກແຫຼ່ງ ຂອງກະຊວງພາຍໃນ ຂຶ້ນໃນວັນທີ 13 ສິງຫາ 2019 ໂດຍການເປັນປະທານຂອງທ່ານ ຄຳໝັ້ນ ສູນວິເລີດ ລັດຖະມົນຕີກະຊວງພາຍໃນ, ມີ ທ່ານ ສີພຸກ ວົງພັກດີ ຮອງລັດຖະມົນຕີກະຊວງພາຍໃນ, ຄະນະກົມ, ຫົວໜ້າພະແນກ, ຮອງຫົວໜ້າພະແນກ ທີ່ສັງກັດຫ້ອງການ, ບັນດາກົມ, ສະຖາບັນ ແລະ ສູນ ພ້ອມດ້ວຍພະນັກງານທີ່ຮັບຜິດຊອບວຽກງານຈັດຕັ້ງ ເຂົ້າຮ່ວມຈໍານວນ 40 ທ່ານ.

          ການຈັດຝຶກອົບຮົມໃນຄັ້ງນີ້, ກໍເພື່ອຍົກລະດັບຄວາມຮູ້ ຄວາມສາມາດທາງດ້ານວຽກງານຈັດຕັ້ງ, ກໍ່ສ້າງພັກ-ພະນັກງານ ໃຫ້ແກ່ພະນັກງານຫຼັກແຫຼ່ງ ໂດຍສະເພາະວຽກງານຈັດຕັ້ງໃນໄລຍະໃໝ່ ໃຫ້ມີຄວາມໜັກແໜ້ນ ແລະ ເຂັ້ມແຂງ ເຮັດໃຫ້ພະນັກງານຜູ້ທີ່ຮັບຜິດຊອບວຽກງານຈັດຕັ້ງໄດ້ຮັບຮູ້ ແລະ ເຂົ້າໃຈແຈ້ງກ່ຽວກັບພື້ນຖານແນວທາງນະໂຍບາຍຂອງພັກ ແລະ ນິຕິກໍາຕ່າງໆທີ່ພັກກໍານົດອອກໃນແຕ່ລະໄລຍະ, ເຊິ່ງບົດຮຽນທີ່ເອົາມາສະເໜີເພື່ອຄົ້ນຄວ້າຮໍ່າຮຽນໃນຄັ້ງນີ້ມີ 02 ພາກ ແລະ 15 ບົດຄື: ພາກວິຊາວຽກພັກປະກອບມີ ລະບົບການຈັດຕັ້ງ ຫຼັກການ ແລະ ທິດນໍາກໍ່ສ້າງພັກ, ວິທີຈັດຕັ້ງປະຕິບັດແນວທາງນະໂຍບາຍຂອງພັກ, ຍົກສູງຄຸນນະພາບການຈັດຕັ້ງຮາກຖານພັກໃຫ້ປອດໃສ ເຂັ້ມແຂງ ໜັກແໜ້ນ, ການຍົກສູງຄຸນນະພາບຂອງສະມາຊິກພັກ ແລະ ວຽກງານຂະຫຍາຍພັກໃນໄລຍະໃໝ່, ການຕີລາຄາຄຸນນະພາບ ແບ່ງປະເພດສະມາຊິກພັກ ແລະ ໜ່ວຍພັກ, ເພີ່ມທະວີວຽກງານຄຸ້ມຄອງ ແລະ ລະບຽບການຍົກຍ້າຍຮ່ວມສະມາຊິກພັກ, ການກະກຽມຈັດກອງປະຊຸມໃຫຍ່ 3 ຂັ້ນຂອງພັກ, ເນື້ອໃນພື້ນຖານກ່ຽວກັບວຽກງານປ້ອງກັນພັກ-ພະນັກງານ. ສ່ວນພາກວິຊາວຽກງານພະນັກງານ ຈະໄດ້ຮຽນຮູ້ກ່ຽວກັບ ການສັບປ່ຽນໜ້າທີ່ ແລະ ບ່ອນປະຈໍາການຂອງພະນັກງານ, ວຽກງານຕີລາຄາ ແລະ ນໍາໃຊ້ພະນັກງານ, ວຽກງານຄຸ້ມຄອງພະນັກງານ,ວຽກງານຂຶ້ນແຜນກໍານົດພະນັກງານ, ການສ້າງມາດຖານພະນັກງານ, ການບໍາລຸງ-ກໍ່ສ້າງພະນັກງານນໍາພາ-ຄຸ້ມຄອງ ແລະ ການປະຕິບັດນະໂຍບາຍຕໍ່ພະນັກງານ-ລັດຖະກອນ ຢູ່ ສປປ ລາວ; ການຝຶກອົບຮົມໃນຄັ້ງນີ້ ຈະດໍາເນີນໄປເປັນເວລາ 09 ວັນ.

     

Leave a Reply

Your email address will not be published. Required fields are marked *