ກະຊວງພາຍໃນ

Ministry of Home Affairs

ລັດຖະມົນຕີກະຊວງພາຍໃນ ສປປ ລາວ ເຂົ້າຮ່ວມກອງປະຊຸມໂຕະມົນລະດັບລັດຖະມົນຕີ ແລະ ງານວາງ ສະແດງນະວັດຕະກຳການບໍລິການ ຂອງ ພາກລັດ ອາຊຽນ-ເກົາຫຼີ ທີ່ ນະຄອນບູຊານ ສ. ເກົາຫຼີ.

ໃນລະຫວ່າງວັນທີ 25 – 26 ພະຈິກ 2019, ຄະນະຜູ້ແທນ ກະຊວງພາຍໃນ ນໍາພາໂດຍ ພະນະທ່ານ ຄໍາໝັ້ນ ສູນວິເລີດ, ລັດຖະມົນຕີ ວ່າການກະຊວງພາຍໃນ, ພ້ອມດ້ວຍຄະນະ 05 ທ່ານ ໄດ້ເຂົ້າຮ່ວມກອງປະຊຸມໂຕະມົນລະດັບລັດຖະມົນຕີ ອາຊຽນ-ເກົາຫຼີ ແລະ ງານວາງສະແດງກ່ຽວກັບ ນະວັດຕະກຳ ການບໍລິການໃນພາກລັດ ທີ່ ນະຄອນບູຊານ ຊື່ງຫົວຂໍ້ຂອງ ກອງປະຊຸມໃນຄັ້ງນີ້ ແມ່ນ “ການສົ່ງເສີມການປົກຄອງທີ່ດີ: ເພື່ອສ້າງອະນາຄົດທີ່ດີ ສຳລັບທຸກຄົນ”. ກອງປະຊຸມໂຕະມົນ ໄດ້ຮັບກຽດການເປັນປະທານ ໂດຍ ພະນະທ່ານ ຊິນ ຢັງ (Chin Young) ລັດຖະມົນຕີ ວ່າການ ກະຊວງພາຍໃນ ແລະ ຄວາມປອດໄພ ສ. ເກົາຫຼີ,  ຊື່ງກອງປະຊຸມໂຕະມົນໃນຄັ້ງນີ້ ໄດ້ມີການສົນທະນາ, ປຶກສາຫາລື ແລະ ແລກປ່ຽນບົດຮຽນປະສົບການທີ່ດີ ຕໍ່ກັບການມີສ່ວນຮ່ວມຂອງປະຊາຊົນ ໃນການປັບປຸງການບໍລິການຂອງ ພາກລັດ, ການນຳໃຊ້ເຕັກໂນໂລຊີດິຈິຕອນ ເຂົ້າໃນການບໍລິການຂອງພາກລັດ ແລະ ການສ້າງຄວາມເຂັ້ມແຂງໃຫ້ແກ່ທ້ອງຖິ່ນ ແລະ ການພັດທະນາພາກພື້ນ, ຊື່ງ ຜູ້ແທນ ສປປ ລາວ ກໍ່ໄດ້ປະກອບສ່ວນແລກປ່ຽນຄຳຄິດເຫັນ ຕໍ່ກັບວຽກງານການສ້າງຄວາມເຂັ້ມແຂງໃຫ້ແກ່ອົງການປົກຄອງທ້ອງຖິ່ນ ແລະ ການພັດທະນາໃນພາກພື້ນ ແລະ ນອກຈາກນີ້ກໍ່ມີຄະນະວິຊາການ ທີ່ມາຈາກ ກະຊວງພາຍໃນ ສປປ ລາວ ປະກອບສ່ວນນຳສະເໜີບົດຮຽນທີ່ດີກ່ຽວກັບ ການພົວພັນລະຫວ່າງສູນກາງ ແລະ ທ້ອງຖິ່ນທາງດ້ານວຽກງານການຝຶກອົບຮົມລັດຖະກອນ.

ໃນໂອກາດເຂົ້າຮ່ວມກອງປະຊຸມໂຕະມົນຄັ້ງນີ້ ຄະນະຜູ້ແທນກະຊວງພາຍໃນ ສປປ ລາວ ແລະ ກະຊວງພາຍໃນ ແລະ ຄວາມປອດໄພ ສ. ເກົາຫຼີ ໄດ້ຈັດກອງປະຊຸມພົບປະສອງຝ່າຍ ຂຶ້ນໃນວັນທີ 25 ພະຈິກ 2019 ໂດຍທັງ 2 ຝ່າຍ ໄດ້ຕີລາຄາສູງຕໍ່ການຮ່ວມມື ໃນໄລຍະຜ່ານມາ ເປັນຕົ້ນການສະໜັບສະໜູນ ສປປ ລາວ ໃນຂົງເຂດວຽກງານສໍາເນົາເອກະສານ ແລະ ການຍົກລະດັບສ້າງຂີດຄວາມສາມາດ ໃຫ້ແກ່ ພະນັກງານ-ລັດຖະກອນ. ນອກຈາກນີ້ ທັງ 2 ຝ່າຍ ໄດ້ແລກປ່ຽນກ່ຽວກັບວຽກງານຈຸດສຸມ ພາລະບົດບາດ ແລະ ຄວາມຮັບຜິດຊອບ ຂອງຕົນ ເຊິ່ງທັງ 2 ຝ່າຍ ໄດ້ເຫັນດີເປັນເອກະພາບກັນ ໃນການສືບຕໍ່ເສີມຂະຫຍາຍການຮ່ວມມື ແລະ ມູນເຊື້ອສາຍພົວພັນທີ່ດີ ລະຫວ່າງ ສອງພັກ ສອງລັດ ແລະ ປະຊາຊົນສອງຊາດ ໃຫ້ນັບມື້ນັບຂະຫຍາຍຕົວເຕີບໃຫຍ່ເຂັ້ມແຂງຮອບດ້ານ.

Leave a Reply

Your email address will not be published. Required fields are marked *