ກະຊວງພາຍໃນ

Ministry of Home Affairs

ກະຊວງພາຍໃນ ສະຫຼຸບການຈັດຕັ້ງປະຕິບັດວຽກງານປະຈຳປີ 2019 ແລະ ວາງແຜນການປະຈໍາປີ 2020

ເພື່ອເປັນການທົບທວນຄືນຜົນສໍາເລັດການຈັດຕັ້ງປະຕິບັດວຽກງານໃນ 01 ປີຜ່ານມາ ພ້ອມທັງເປັນການຊຸກຍູ້, ຕິດຕາມກວດກາການຈັດຕັ້ງປະຕິບັດວຽກງານຂອງບັນດາຂອດປະສານງານຂອບເຂດສິດ ແລະ ໜ້າທີ່ຮັບຜິດຊອບຂັ້ນສູນກາງ ແລະ ທ້ອງຖິ່ນ, ວັນທີ 23 ທັນວາ 2019 ກະຊວງພາຍໃນ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານ ປະຈຳປີ 2019 ແລະ ທິດທາງແຜນການປະຈຳປີ 2020 ຂຶ້ນ ໂດຍການເປັນປະທານຂອງທ່ານ ຄຳໝັ້ນ ສູນວິເລີດ ລັດຖະມົນຕີກະຊວງພາຍໃນ, ມີຮອງລັດຖະມົນຕີ, ມີຫົວໜ້າຫ້ອງການ, ຫົວໜ້າກົມຈັດຕັ້ງ ແລະ ພະນັກງານ ຂອງບັນດາກະຊວງ ແລະ ອົງການທຽບເທົ່າ, ມີບັນດາຫົວໜ້າກົມ, ຫ້ອງການ, ສູນ ແລະ ສະຖາບັນ ທີ່ສັງກັດກະຊວງພາຍໃນ, ບັນດາຫົວໜ້າພະແນກພາຍໃນແຂວງ ທົ່ວປະເທດ ແລະ ພະນັກງານຫຼັກແຫຼ່ງ ຂອງກະຊວງພາຍໃນ ເຂົ້າຮ່ວມ.

ໃນກອງປະຊຸມພາຍຫຼັງທ່ານຄຳໝັ້ນ ສູນວິເລີດ ລັດຖະມົນຕີກະຊວງພາຍໃນ ໄດ້ໃຫ້ກຽດກ່າວເປີດກອງປະຊຸມຢ່າງເປັນທາງການ. ຜູ້ເຂົ້າຮ່ວມໄດ້ຮັບຟັງທ່ານ ຄໍາມູນ ວິພົງໄຊ ຮອງລັດຖະມົນຕີກະຊວງພາຍໃນ ຂຶ້ນຜ່ານບົດລາຍງານການສະຫຼຸບການຈັດຕັ້ງປະຕິບັດວຽກງານ ປະຈຳປີ 2019 ແລະ ທິດທາງແຜນການ ປະຈຳປີ 2020 ຂອງກະຊວງພາຍໃນ ໂດຍທ່ານໄດ້ຍົກໃຫ້ເຫັນ: ໃນໄລຍະໜຶ່ງປີຜ່ານມາ ການຈັດຕັ້ງປະຕິບັດໜ້າທີ່ວຽກງານ ຂອງຂະແໜງພາຍໃນ ເຖິງແມ່ນວ່າຈະມີສິ່ງທ້າທາຍ ແລະ ມີຂໍ້ຈໍາກັດຫຼາຍດ້ານກໍຕາມ ແຕ່ກໍໄດ້ພ້ອມກັນທຸ້ມເທຄວາມສາມາດ ແລະ ສະຕິປັນຍາເຂົ້າໃນການປະຕິບັດໜ້າທີ່ການເມືອງ ຕາມພາລະບົດບາດ ຂອງຂະແໜງພາຍໃນ ທີ່ສູນກາງພັກ ແລະ ລັດຖະບານມອບໃຫ້ ຊຶ່ງສາມາດຍາດໄດ້ຜົນສໍາເລັດຫຼາຍດ້ານ ໂດຍສະເພາະແມ່ນ ດ້ານການປັບປຸງວຽກງານການປົກຄອງ-ການບໍລິຫານລັດ ເປັນຕົ້ນແມ່ນການຕິດຕາມ ແລະ ຊຸກຍູ້ການປັບປຸງກົງຈັກການຈັດຕັ້ງ ຂອງລັດ ທັງສູນກາງ ແລະ ທ້ອງຖິ່ນ, ການປັບປຸງນິຕິກໍາ ແລະ ລະບຽບການເພື່ອຄຸ້ມຄອງບໍລິຫານລັດ, ການປັບປຸງລະບົບການປົກຄອງ ຢູ່ຂັ້ນທ້ອງຖິ່ນ ແລະ ສາຍພົວພັນລະຫວ່າງ ສູນກາງ ແລະ ທ້ອງຖິ່ນ, ການພັດທະນາວຽກງານຄຸ້ມຄອງພົນລະເມືອງ, ການຄຸ້ມຄອງວຽກງານຊົນເຜົ່າ ແລະ ສາສະໜາ, ການຄຸ້ມຄອງອົງການຈັດຕັ້ງທາງສັງຄົມ; ພ້ອມທັງປັບປຸງລະບົບ ແລະ ກົນໄກການສະໜອງການບໍລິການຂອງລັດ ເພື່ອການປົກຄອງທີ່ດີ, ດ້ານການປັບປຸງວຽກງານລັດຖະກອນ ໂດຍສະເພາະ ແມ່ນການປັບປຸງລະບົບຄຸ້ມຄອງລັດຖະກອນ ໂດຍການຫັນລະບົບການຄຸ້ມຄອງແບບເກົ່າໄປສູ່ລະບົບທັນສະໄໝ, ການປະເມີນຜົນການປະຕິບັດວຽກງານ ຂອງລັດຖະກອນ ກໍຄືການຍົກລະດັບຂີດຄວາມສາມາດ ຂອງລັດຖະກອນ, ດ້ານການປັບປຸງເຕັກນິກການປົກຄອງ ເຊັ່ນ: ວຽກງານຄຸ້ມຄອງ ແລະ ສໍາເນົາເອກະສານ, ວຽກງານຂົງເຂດສຳຫຼວດ, ວັດແທກ ແລະ ແຜນທີ່, ວຽກງານແຂ່ງຂັນ ແລະ ຍ້ອງຍໍ, ດ້ານການພົວພັນຮ່ວມມືພາກພຶ້ນ ແລະ ສາກົນ.

ພ້ອມດຽວກັນນີ້ ຜູ້ເຂົ້າຮ່ວມກອງປະຊຸມຍັງໄດ້ຮັບຟັງການປະກອບຄໍາເຫັນກ່ຽວກັບວຽກງານການປັບປຸງກົງຈັກລັດ ຕາມຄໍາສັ່ງຂອງທ່ານນາຍົກລັດຖະມົນຕີ ສະບັບເລກທີ 03/ນຍ ວ່າດ້ວຍການປັບປຸງຄຸນນະພາບການເຄື່ອນໄຫວຂອງກົງຈັກການຈັດຕັ້ງ ແລະ ການບັນຈຸລັດຖະກອນໃໝ່, ວຽກງານການຄຸ້ມຄອງລັດຖະກອນ ຕິດພັນກັບການແຈກຢາຍບັດພະນັກງານ-ລັດຖະກອນ, ວຽກງານປະເມີນຜົນການຈັດຕັ້ງປະຕິບັດວຽກງານ ຂອງພະນັກງານ-ລັດຖະກອນ, ວຽກງານການແກ້ໄຂເຂດແດນເຊື່ອມຕໍ່ ແລະ ການປັບປຸງກົງຈັກຂັ້ນທ້ອງຖິ່ນ ຕິດພັນກັບວຽກງານ 03 ສ້າງ, ການປັບປຸງກົງຈັກ ຂອງກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ການນໍາໃຊ້ລະບົບອອນລາຍເຂົ້າໃນການປະເມີນຜົນການຈັດຕັ້ງປະຕິບັດວຽກງານ ຂອງພະນັກງານ-ລັດຖະກອນ ກະຊວງພະລັງງານ ແລະ ບໍ່ແຮ່,  ນອກຈາກນີ້ ທ່ານ ສີພຸກ ວົງພັກດີ ຮອງລັດຖະມົນຕີກະຊວງພາຍໃນ ໄດ້ໃຫ້ກຽດຂຶ້ນເຜີຍແຜ່ຄໍາແນະນໍາກ່ຽວກັບການປະເມີນການຈັດຕັ້ງປະຕິບັດວຽກງານສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ.

    ໃນໂອກາດເຂົ້າຮ່ວມກອງປະຊຸມ ທ່ານ ຄຳໝັ້ນ ສູນວິເລີດ ລັດຖະມົນຕີກະຊວງພາຍໃນ ໄດ້ໂອ້ລົມຕໍ່ກອງປະຊຸມ ໂດຍທ່ານໄດ້ທົບທວນຄືນເຖິງຄໍາຂວັນທີ່ທ່ານນາຍົກລັດຖະມົນຕີ ໄດ້ສະເໜີໃນກອງປະຊຸມປະຈໍາປີ 2018 ຂອງກະຊວງພາຍໃນ ວ່າ “ກົງຈັກກະທັດຮັດ, ໜັກແໜ້ນ, ເຂັ້ມແຂງ, ມີປະສິດທິຜົນ, ໂປ່ງໃສ ແລະ ຮັບໃຊ້ປະຊາຊົນຢ່າງແທ້ຈິງ” ເຊິ່ງຕໍ່ກັບຄໍາຂວັນດັ່ງກ່າວນີ້ ຂະແໜງພາຍໃນ ໄດ້ພະຍາຍາມ ແລະ ເອົາໃຈໃສ່ໃນການຜັນຂະຫຍາຍຄໍາຂວັນດັ່ງກ່າວເຂົ້າໃນການປະຕິບັດວຽກງານຕົວຈິງ ໃນການຄົ້ນຄວ້າ ແລະ ປັບປຸງວຽກງານຕ່າງໆ ໂດຍສະເພາະແມ່ນເນື້ອໃນຈິດໃຈຂອງຄໍາສັ່ງເລກທີ 03/ນຍ ໃຫ້ປາກົດຜົນເປັນຈິງເທື່ອລະກ້າວ, ການຄົ້ນຄວ້າປັບປຸງກົງຈັກ ຕິດພັນກັບການກໍານົດຕໍາແໜ່ງງານຄືນໃໝ່ໃຫ້ສອດຄ່ອງກັບພາລະບົດບາດຂອງແຕ່ລະການຈັດຕັ້ງ. ສໍາລັບປີ 2020 ຊຶ່ງເປັນປີສຸດທ້າຍຂອງແຜນການ 5 ປີຄັ້ງທີ I ຂອງຂະແໜງການພາຍໃນ, ທ່ານ ຄຳໝັ້ນ ສູນວິເລີດ ລັດຖະມົນຕີກະຊວງພາຍໃນ  ໄດ້ເນັ້ນໃຫ້ແຕ່ລະພາກສ່ວນເອົາໃຈໃສ່ກວດກາຄືນບັນຫາທີ່ຍັງເປັນຈຸດຄົງຄ້າງຕ້ອງໄດ້ແກ້ໄຂ ແລະ ຈະຕ້ອງໄດ້ສືບຕໍ່ເອົາໃຈໃສ່ປະຕິບັດຄໍາຂວັນດັ່ງກ່າວໃຫ້ປາກົດຜົນເປັນຈິງ ແລະ ເຮັດໃຫ້ການປັບປຸງວຽກງານໄດ້ຮັບຜົນດີກວ່າເກົ່າ ເພື່ອປະຕິບັດພາລະບົດບາດເປັນເສນາທິການໃຫ້ແກ່ລັດຖະບານ ແລະ ອົງການປົກຄອງທ້ອງຖິ່ນ ຕາມຄວາມຮັບຜິດຊອບຂອງຂະແໜງການພາຍໃນ ໂດຍສະເພາະກ່ຽວກັບການຄົ້ນຄວ້າປັບປຸງກົງຈັັກການຈັດຕັ້ງຂອງອົງການບໍລິຫານລັດ ທັງໃນລະດັບສູນກາງ ແລະ ທ້ອງຖິ່ນ ແລະ ບັນຫາອື່ນທີ່ປິ່ນອ້ອມ ລວມທັງວຽກລັດຖະກອນ, ວຽກເຕັກນິກການປົກຄອງ ແລະ ການຮ່ວມມືສາກົນ ໃຫ້ມີຄວາມເຂັ້ມແຂງ ແລະ ໜັກແໜ້ນ.

Leave a Reply

Your email address will not be published. Required fields are marked *