ກະຊວງພາຍໃນ

Ministry of Home Affairs

ກອງປະຊຸມປະຈໍາປີຂອງແຜນງານປັບປຸງບູລະນະການປົກຄອງແຫ່ງຊາດ

ແຜນງານປັບປຸງບູລະນະການປົກຄອງແຫ່ງຊາດ (National GPAR Programme) ໄດ້ຈັດກອງປະຊຸມປະຈຳປີ ຂຶ້ນ ໃນວັນທີ 29 ມັງກອນ 2020 ນີ້ ທີ່ຫ້ອງປະຊຸມລັດວິສາຫະກິດໄຟຟ້າລາວ, ນະຄອນຫຼວງວຽງຈັນ ໂດຍການເປັນປະທານຮ່ວມ ຂອງ ທ່ານ ຄຳໝັ້ນ ສູນວິເລີດ ລັດຖະມົນຕີກະຊວງພາຍໃນ ແລະ ທ່ານ ນາງ ຣິຄາດາ ຣີເຈີ  (Ricarda Rieger), ຜູ້ຕາງໜ້າອົງການ ສປຊ ເພື່ອການພັດທະນາ ປະຈໍາ ສປປ ລາວ. ເຂົ້າຮ່ວມກອງປະຊຸມມີ ທ່ານ ເອກອັກຄະລັດຖະທູດສະຫະພາບເອີຣົບ ປະຈໍາ ສປປ ລາວ, ຜູ້ອໍານວຍການອົງການຮ່ວມມື ເພື່ອການພັດທະນາຂອງປະ ເທດສະວິດເຊີແລນ ປະຈໍາພາກພື້ນແມ່ນໍ້າຂອງ, ບັນດາທ່ານຜູ້ຕາງໜ້າຈາກບັນດາກະຊວງ-ອົງການຂອງລັດ, ຜູ້ຕາງໜ້າຈາກບັນດາສະຖານທູດ, ອົງການຄູ່ຮ່ວມພັດທະນາ, ອົງການຈັດຕັ້ງທີ່ບໍ່ສັງກັດລັດຖະບານ, ອົງການຈັດຕັ້ງທາງສັງຄົມ ແລະ ພະນັກງານທີ່ກ່ຽວຂ້ອງເຂົ້າຮ່ວມ.

ທ່ານ ຄຳ​ໝັ້ນ ສູນ​ວິ​ເລີດ ໄດ້ກ່າວໃນພິທີເປີດກອງປະຊຸມ​ວ່າ: ແຜນ​ງານ​ປັບ­ປຸງ​ບູ­ລະ­ນະ​ການ​ປົກ­ຄອງ​ແຫ່ງ​ຊາດ ແມ່ນ​ແຜນ​ງານ​ລະ­ດັບ​ຊາດ​ທີ່​ເຮັດ​ໜ້າ­ທີ່​ຊ່ວຍ​ລັດ­ຖະ­ບານ ໃນ​ການ​ສະ­ໜັບ­ສະ­ໜູນ​ວຽກ​ງານ​ການ​ປັບ­ປຸງ ການ​ບໍ­ລິ­ຫານ​ລັດ ສົ່ງ­ເສີມ​ການ​ບໍ­ລິ­ການ​ທີ່​ດີ​ເຂົ້າ​ເຖິງ​ທ້ອງ­ຖິ່ນ ຊ່ວຍ​ໃຫ້​ລັດ­ຖະ­ບານ​ໃນ​ການ​ສ້າງ​ຄວາມ​ເຂັ້ມ­ແຂງ​ໃຫ້​ພະ­ນັກ­ງານ-ລັດ­ຖະ­ກອນ ນັບ​ແຕ່​ສູນ​ກາງ​ລົງ​ຮອດ​ທ້ອງ­ຖິ່ນ ເຊິ່ງ​ກະ­ຊວງ​ພາຍ​ໃນ ​ໄດ້​ປະ­ສານ​ສົມ­ທົບ​ກັບ​ຂະ­ແໜງ­ການ​ກ່ຽວ­ຂ້ອງ ອົງ​ການ­ຈັດ­ຕັ້ງ​ສາ­ກົນ ຄູ່​ຮ່ວມ​ພັດ­ທະ­ນາ​ຕ່າງໆ ເພື່ອ​ດຳ­ເນີນ​ກິດ­ຈະ­ກຳ​ໃຫ້​ສອດ­ຄ່ອງ​ກັບ​ບັນ­ດາ​ນິ­ຕິ​ກຳ ແລະ ນະ­ໂຍ­ບາຍ​ຂອງ​ລັດ­ຖະ­ບານ​ທີ່​ໄດ້​ຮັບ​ການ​ປັບ­ປຸງ​ຕາມ​ທິດ​ສາມ​ສ້າງ ໃຫ້​ຈັດ​ຕັ້ງ​ປະ­ຕິ­ບັດ​​ໄປ​ເຖິງ​ທ້ອງ­ຖິ່ນ ເຂດ​ຫ່າງ​ໄກ​ສອກ­ຫຼີກ ແຜນ​ງານ​ດັ່ງ­ກ່າວ​ໄດ້​ຈັດ​ຕັ້ງ​ປະ­ຕິ­ບັດ​ບັນ­ດາ​ອົງ​ປະ­ກອບ​ທີ່​ສຳ­ຄັນ ເປັນ­ຕົ້ນ ການ­ຈັດ­ຕັ້ງ​ປະ­ຕິ­ບັດ​ທຶນ​ພັດ­ທະ­ນາ​ເມືອງ  ເພ­ດານ​ບໍ່​ເກີນ 250 ລ້ານ​ກີບ ເປັນ​ທຶນ​ທີ່​ຊ່ວຍ​ສົ່ງ­ເສີມ​ຫົວ­ຄິດ​ປະ­ດິດ​ສ້າງ ແລະ ຄວາມ​ເປັນ​ເຈົ້າ​ການ​ຂອງ​ອຳ­ນາດ​ການ​ປົກ­ຄອງ ໂດຍ​ອີງ­ໃສ່​ບຸ­ລິ­ມະ­ສິດ​ຂອງ​ເມືອງ​ໃນ​ການ​ສະ­ເໜີ​ແຜນ​ກໍ່­ສ້າງ​ພື້ນ­ຖານ​ໂຄງ​ລ່າງ​ຂະ­ໜາດ​ນ້ອຍ ພ້ອມ​ນີ້ ໄດ້​ອີງ­ໃສ່​ເງື່ອນ­ໄຂ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ ທຸກ​ຄົນ​ຕ້ອງ​ກ້າວ​ໄປ​ພ້ອມ​ກັນ ແນ­ໃສ່​ຫຼຸດ­ຜ່ອນ​ຄວາມ​ແຕກ​ໂຕນ ດ້ວຍ​ການ​ຄຸ້ມ​ຄອງ​ຂອງ​ອຳ­ນາດ​ການ​ປົກ­ຄອງ ເພື່ອ​ຜົນ​ປະ­ໂຫຍດ​ຂອງ​ເມືອງ ເຊິ່ງໃນປີ 2019 ຜ່ານມາ ຈັດ​ຕັ້ງ​ປະ­ຕິ­ບັດ​ໄດ້ 12 ໂຄງ­ການ ສາ­ມາດ​ສົ່ງ​ຜົນ​ປະ­ໂຫຍດ​ໃຫ້​ປະ­ຊາ­ຊົນ ໄດ້​ປະ­ມານ 73.000 ຄົນ ໂຄງ­ການ​ສ່ວນ​ຫຼາຍ​ຈະ​ເນັ້ນ​ໃສ່​ປະ­ເພດ​ນ້ຳ​ສະ­ອາດ ເສັ້ນ­ທາງ​ສູ່​ບ້ານ ໂຮງ­ຮຽນ ສຸກ­ສາ­ລາ ແລະ ຕະ­ຫຼາດ​ຊຸມ​ຊົນ ໂຄງ­ການດັ່ງກ່າວໄດ້​ເລີ່ມ​ຈັດ​ຕັ້ງ​ປະ­ຕິ­ບັດ​ມາ​ແຕ່​ປີ 2017.

          ປັດ­ຈຸ­ບັນ ເພື່ອ​ສົ່ງ­ເສີມ​ກິດ­ຈະ­ກຳ​ການ​ປັບ­ປຸງ​ການ​ປົກ­ຄອງ ການ​ສະ­ໜອງ​ທຶນ​ໃຫ້​ບັນ­ດາ​ອົງ​ການ­ຈັດ­ຕັ້ງ​ລັດ ແລະ ສະ­ມາ­ຄົມ ມີ​ທຶນ​ຂະ­ໜາດ​ນ້ອຍຈໍານວນໜຶ່ງ ເພ­ດານ​ບໍ່​ເກີນ 80 ລ້ານ​ກີບ ໂດຍເປັນ​ທຶນ​ກະ­ຕຸກ​ຊຸກ­ຍູ້​ໃຫ້​ມີ​ການ​ປັບ­ປຸງ​ການ​ບໍ­ລິ­ຫານ​ລັດ​ຂັ້ນ​ທ້ອງ­ຖິ່ນ ເພື່ອ​ສະ­ໜອງ​ການ​ບໍ­ລິ­ການ​ຂອງ​ລັດ​ຂັ້ນ​ທ້ອງ­ຖິ່ນ ເຂດ​ຫ່າງ​ໄກ​ສອກ­ຫຼີກ ເປັນ​ທຶນ​ໃຊ້​ງົບ­ປະ­ມານ​ບໍ່​ຫຼາຍ ແຕ່​ສາ­ມາດ​ສົ່ງ­ເສີມ​ໃຫ້​ເກີດ​ປະ­ໂຫຍດ​ສູງ​ສຸດ.

Hits: 49

Leave a Reply

Your email address will not be published. Required fields are marked *