ກະຊວງພາຍໃນ

Ministry of Home Affairs

ກອງປະຊຸມໃຫຍ່ ຄັ້ງທີ II ຂອງໜ່ວຍພັກກົມກວດກາ ກະຊວງພາຍໃນ

ກອງປະຊຸມໃຫ່ຍ ຄັ້ງທີ II ໜ່ວຍພັກກົມກວດກາ ກະຊວງພາຍໃນ ໄດ້ຈັດຂຶ້ນໃນວັນທີ 25 ກຸມພາ 2020 ນີ້ ໂດຍການເຂົ້າຮ່ວມ ຂອງ ສະຫາຍ ຄຳໝັ້ນ ສູນວິເລີດ ກຳມະການສູນກາງພັກ, ເລຂາຄະນະພັກ, ລັດຖະມົນຕີກະຊວງພາຍໃນ ເຂົ້າຮ່ວມມີ ຄະ​ນະພັກ ກະຊວງ, ເລຂາ, ຮອງເລຂາໜ່ວຍພັກ ຈາກຫ້ອງການ, ບັນດາກົມ, ສະຖາບັນ, ສູນ, ຕາງໜ້າ 3 ອົງການຈັດຕັ້ງມະຫາຊົນກະຊວງພາຍໃນ ແລະ ສະມາຊິກສົມບູນ ແລະ ສຳຮອງຂອງໜ່ວຍພັກກົມກວດກາເຂົ້າຮ່ວມ.

ກອງປະຊຸມຄັ້ງນີ້ ໄດ້ສະຫຼຸບຕີລາຄາຄືນການຊີ້ນຳ-ນຳພາຮອບດ້ານກໍ່ຄືການເຄື່ອນໄຫວໃນການຈັດຕັ້ງປະຕິບັດພາລະບົດບາດ, ໜ້າທີ່ວິຊາສະເພາະໃນໄລຍະ 5 ປີ ຜ່ານມາ ຂອງໜ່ວຍພັກກົມກວດກາ ເພື່ອຍົກໃຫ້ເຫັນຜົນງານດ້ານດີທີ່ຈະຕ້ອງໄດ້ສືບຕໍ່ສົ່ງເສີມ ແລະ ດ້ານອ່ອນ, ຂໍ້ຄົງຄ້າງ ທີ່ໜ່ວຍພັກຈະຕ້ອງໄດ້ພ້ອມກັນຄົ້ນຄວ້າແກ້ໄຂໃນຕໍ່ໜ້າ ທີ່ໄດ້ສະແດງອອກໃນບົດລາຍງານການເມືອງຂອງໜ່ວຍພັກ ແລະ ບົດສໍາຫຼວດການນໍາພາລວມຂອງຄະນະໜ່ວຍພັກໃນໄລຍະ 5 ປີຜ່ານມາ ເຊິ່ງເປັນຂີດໝາຍສຳຄັນໃນການປັບປຸງ ບົດບາດການນຳພາຂອງຄະນະໜ່ວຍພັກ ແລະ ປັບປຸງຄຸນນະພາບຂອງບັນດາສະມາຊິກພາຍໃນໜ່ວຍພັກໃຫ້ເຂັ້ມແຂງ ແລະ ໜັກແໜ້ນ.

        ນອກຈາກນັ້ນ ໃນກອງປະຊຸມ ຍັງໄດ້ຈັດໃຫ້ມີພິທີປ່ອນບັດຄັດເລືອກເອົາຄະນະໜ່ວຍພັກກົມກວດກາຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ,ຖືກຕ້ອງ ແລະ ສອດຄ່ອງກັບມາດຖານ, ເງື່ອນໄຂ ທີ່ໄດ້ກຳນົດໄວ້ ໂດຍກອງປະຊຸມໄດ້ເຫັນດີເປັນເອກະພາບ ເລືອກເອົາ ສະຫາຍ ຕ໋ອງ ພູມມີພັນ ເປັນ​ເລ​ຂາ​ໜ່ວຍ​ພັກ, ເລືອກເອົາ, ສະຫາຍ ທອງວັນ ສີສະຫວັນ ເປັນຮອງເລຂາໜ່ວຍພັກ ແລະ ເລືອກເອົາ ສະຫາຍ ນ. ຂັນຄຳ ແສງປະທຸມມາ ເປັນກຳມະການພັກທັງເປັນຜູ້ກວດກາໜ່ວຍພັກ.

ໃນຕອນທ້າຍກອງປະຊຸມ ສະຫາຍ ຄຳ​ໝັ້ນ ສູນ​ວິ​ເລີດ ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງພາຍໃນ ໄດ້ມີຄຳເຫັນໂອ້ລົມຕໍ່ກອງປະຊຸມ ໂດຍສະຫາຍໄດ້ ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດ ໃນການຊີ້ນຳ-ນຳພາ ຂອງຄະນະໜ່ວຍພັກຊຸດເກົ່າ ໃນໄລຍຜ່ານມາ ທີ່ໄດ້ຊີ້ນຳ-ນຳພາ ສະມາຊິກພັກ, ພະນັກງານ-ລັດຖະກອນ ເອົາໃຈໃສ່ ປະຕິບັດໜ້າທີ່ການເມືອງຂອງຕົນໄດ້ຮັບຜົນສຳເລັດ​ຫຼາຍດ້ານ ພ້ອມນັ້ນ ສະຫາຍຍັັງໄດ້ເນັ້ນ ໃຫ້ຄະນະໜ່ວຍພັກຊຸດໃໝ່ ຈົ່ງເອົາໃຈໃສ່ໃນການຍົກສູງຄວາມຮັບຜິດຊອບໜ້າທີ່ການເມືອງຂອງຕົນໃຫ້ສູງຂຶ້ນ ເພື່ອຕິດຕາມ, ກວດກາ ການປະຕິບັດພາລະບົດບາດການນໍາພາຂອງພັກ ແລະ ການຄຸ້ມຄອງຂອງລັດ, ໃຫ້ສົມກັບທັດສະນະຂອງພັກທີ່ວ່າ “ ບໍ່ມີການກວດກາກໍ່ໝາຍຄວາມວ່າບໍ່ມີການນໍາພາ ”.

Hits: 44

Leave a Reply

Your email address will not be published. Required fields are marked *