ກະຊວງພາຍໃນ

Ministry of Home Affairs

ກອງປະຊຸມໃຫຍ່ ຂອງໜ່ວຍພັກຮາກຖານ ພະແນກພາຍໃນແຂວງຈຳປາສັກ ຄັ້ງທີ II

ກອງປະຊຸມໃຫຍ່ ຂອງໜ່່່ວຍພັກຮາກຖານ ພະແນກພາຍໃນແຂວງຈຳປາສັກ ຄັ້ງທີ II ໄດ້ຈັດຂຶ້ນໃນວັນທີ 30 ມັງກອນ 2020  ທີ່ ຫ້ອງປະຊຸມໃຫຍ່ຫ້ອງວ່າການແຂວງ ໂດຍໃຫ້ກຽດເຂົ້າຮ່ວມ ຂອງ ສະຫາຍ ສົມສະໜິດ ບຸດຕິວົງ ຮອງເລຂາພັກແຂວງ, ຮອງເຈົ້າແຂວງໆຈໍາປາສັກ ມີສະຫາຍ ພອນໄຊ ເກດມາລາ ຮອງຫົວໜ້າຄະນະຈັດຕັ້ງແຂວງ ສະຫາຍ ມະນີວົງ ແສນລາດ ເລຂາໜ່ວຍພັກ ຫົວໜ້າພະແນກພາຍໃນແຂວງຈໍາປາສັກ ພ້ອມດ້ວຍບັນດາ ສະຫາຍ ເລຂາ-ຮອງເລຂາ ໜ່ວຍພັກຮາກຖານພະແນກພາຍໃນ ຕ່າງໜ້າສາມອົງການຈັດຕັ້ງມະຫາຊົນ ແລະ ສະມາຊິກພັກສົມບູນ-ສໍາຮອງ ເຂົ້າຮ່ວມ.

ກອງປະຊຸມຄັ້ງນີ້ ສະຫາຍ ມະນີວົງ ແສນລາດ ເລຂາໜ່ວຍພັກຮາກຖານ ຫົວໜ້າພະແນກພາຍໃນແຂວງຈໍາປາສັກ ໄດ້ຜ່ານບົດລາຍງານການເມືອງ ໂດຍໄດ້ຍົກໃຫ້ເຫັນຜົນງານອັນພົ້ນເດັ່ນ ຂໍ້ສະດວກ ແລະ ຫຍຸ້ງ ຍາກ ກໍຄື ບັນຫາທີ່ເປັນສິ່ງທ້າທ້າຍໃນການເຄື່ອນໄຫວຊີ້ນໍານຳພາໃນໄລຍະ 5 ປີຜ່ານມາ ແລະ ທິດທາງແຜນການຊີ້ນໍານໍາພາໃນໄລຍະ 5 ປີຕໍ່ໜ້າ. ພ້ອມກັນນັ້ນ ກອງປະຊຸມ ໄດ້ພ້ອມກັນປ່ອນບັດຄັດເລືອກເອົາຄະນະໜ່ວຍພັກຮາກຖານພະແນກພາຍໃນ ຊຸດທີ II ຈຳນວນ 3 ສະຫາຍ ໂດຍກອງປະຊຸມໄດ້ເຫັນດີເປັນເອກະພາບເລືຶອກເອົາ ສະຫາຍ ມະນີວົງ ແສນລາດ ເປັນເລຂາຄະນະໜ່ວຍພັກຮາກຖານພະແນກພາຍໃນແຂວງຈໍາປາສັກ ຊຸດໃໝ່ ກອງປະຊຸມຍັງໄດ້ເລືອກເອົາ ສະຫາຍ ບຸນທັນ ຈິນດາວົງ ເປັນຮອງເລຂາ ແລະ ເລືອກເອົາສະຫາຍ ນ ຄໍາບອນ ທອງຈະເລີນ ເປັນຄະນະ ທັງເປັນປະທານກວດກາ. ຕອນທ້າຍກອງປະຊຸມ ໄດ້ຮັບຟັງການໂອ້ລົມຂອງ ສະຫາຍ ສົມສະໜິດ ບຸດຕິວົງ ຮອງເລຂາພັກແຂວງ ຮອງເຈົ້າແຂວງໆຈໍາປາສັກ ໂດຍສະຫາຍໄດ້ເນັ້ນໃຫ້ຄະນະພັກຮາກຖານພະແນກພາຍໃນແຂວງຈໍາປາສັກ ຊຸດໃໝ່ ສືບຕໍ່ເອົາໃຈໃສ່ເພິ່ມທະວີວຽກງານສຶກສາອົບຮົມການເມືອງແນວຄິດ ທັດສະນະຫຼັກໝັ້ນ ຄຸນສົມບັດສິນທໍາປະຕິວັດ ໃນຖັນແຖວພະນັກງານສະມາຊິກພັກ ໂດຍຕິດພັນກັບການປັບປຸງລະບຽບວິໄນໃຫ້ເຂັ້ມງວດ ເສີມຂະຫຍາຍຈິດໃຈຮັກຊາດ ຮັກລະບອບໃໝ່ຢ່າງໜັກແໜ້ນ ເອົາໃຈໃສ່ໃນການຍົກລະດັບ ແລະ ສ້າງພະນັກງານສືບທອດ-ທົດແທນໃຫ້ມີຄຸນນະພາບ ພ້ອມທັງຢຶດໝັ້ນຫຼັກການລວມສູນປະຊາທິປະໄຕ ເຮັດວຽກເປັນໝູ່ຄະນະ ແລະ ແບ່ງວຽກໃຫ້ບຸກຄົນຮັບຜິດຊອບ ຢ່າງລະອຽດຊັດເຈນ.

Hits: 67

Leave a Reply

Your email address will not be published. Required fields are marked *