ກະຊວງພາຍໃນ

Ministry of Home Affairs

ກະຊວງພາຍໃນ ສໍາເລັດໃນການເຜີຍແຜ່ວຽກງານອົງການຈັດຕັ້ງສັງຄົມ ໃນຂອບເຂດທົ່ວປະເທດ

ລະຫວ່າງເດືອນ ມິຖຸນາ 2019 ຜ່ານມາ ຫາ ເດືອນມັງກອນ 2020 ນີ້ ​ທ່ານ ອໍາ​ພາ ສິມ​ມະ​ສອນ ຫົວໜ້າ​ກົມ​ພັດທະນາ​ການ​ບໍລິຫານ​ລັດ ກະຊວງ​ພາຍ​ໃນ ທັງເປັນຫົວໜ້າ​ຄະນະຮັບຜິດຊອບເຜີຍແຜ່ນິຕິກໍາກ່ຽວກັບວຽກງານອົງການຈັດຕັ້ງສັງຄົມ ໄດ້ນໍາພາຄະນະທີ່ປະກອບມີ ຕາງໜ້າ​ກົມອົງການຈັດຕັ້ງສາກົນ (INGO) ​ກະຊວງ​ການ​ຕ່າງປະ​ເທດ ຕາງໜ້າ​ກົມປ້ອງ​ກັນ​ພາຍ​ໃນ ກະຊວງ​ປ້ອງ​ກັນ​ຄວາມ​ສະຫງົບ ແລະ ພະນັກງານທີ່ກ່ຽວຂ້ອງຂອງກະຊວງພາຍໃນ ຈໍານວນໜຶ່ງຮ່ວມ​ເປັນ​ຄະນະ ໄດ້ລົງເຄື່ອນໄຫວເຜີຍແຜ່ນິຕິກໍາດັ່ງກ່າວໃນຂອບເຂດທົ່ວປະເທດ.

ການເຄື່ອນໄຫວຈັດຕັ້ງປະຕິບັດການເຜີຍແຜ່ນິຕິກໍາກ່ຽວກັບວຽກງານອົງການຈັດຕັ້ງສັງຄົມ ຂອງຄະນະດັ່ງກ່າວ ແມ່ນໄດ້ເລີ່ມເຄື່ອນໄຫວຈັດຕັ້ງປະຕິບັດຢູ່ແຂວງ​ບໍລິ​ຄໍາ​ໄຊ ເປັນ​ແຂວງ​ທໍາ​ອິດ ໃນລະຫວ່າງ​ວັນ​ທີ 17-21 ມິຖຸນາ 2019 ຜ່ານມາ ແລະ ໄດ້ສືບຕໍ່ເຄື່ອນໄຫວຈັດຕັ້ງປະຕິບັດເຜີຍແຜ່ມາຮອດວັນທີ 21-24 ມັງກອນ 2020 ນີ້ ທີ່ແຂວງໄຊສົມບູນ ເປັນແຂວງສຸດທ້າຍ ຂອງການເຄື່ອນໄຫວເຜີຍແຜ່ນິຕິກໍາດັ່ງກ່າວ ທັງນີ້ກໍ່ເພື່ອ​ເປັນ​ການ​ຊຸກຍູ້ສົ່ງ​ເສີມອົງການຈັດຕັ້ງພາກ​ລັດ ກໍ່ຄືບັນດາ​ພະ​ແນ​ກການຂັ້ນ​ແຂວງ, ຫ້ອງການ​ຂັ້ນ​ເມືອງ, ບັນດາ​ບ້ານ​ເປົ້າ​ໝາຍ ​ແລະ ບັນດາ​ອົງການ​ຈັດ​ຕັ້ງ​ສັງຄົມ ໃຫ້ມີ​ຄວາມ​ເຂົ້າ​ໃຈ​ກ່ຽວກັບວຽກງານ​ອົງການ​ຈັດ​ຕັ້ງ​ສັງຄົມ​ (ສະມາຄົມ ແລະ ມູນ​ນິທິ) ແລະ ​ວຽກງານ​ຕາ​ປະ​ທັບ​ທີ່​ກ່ຽວຂ້ອງກັບ​ອົງການ​ຈັດ​ຕັ້ງ​ສັງຄົມ ເປັນຕົ້ນແມ່ນ ຂັ້ນ​ຕອນ​ຕ່າງໆ​ໃນການ​ຂໍ​ອະນຸມັດ​ສ້າງ​ຕັ້ງສະມາຄົມ ແລະ ມູນ​ນິທິ, ການ​ຂໍອະນຸຍາດຄວັດຕາ​ປະ​ທັບ, ​ຮູບ​​ແບບ, ຂະໜາດ, ສີ​ນໍ້າ​ມຶກ, ການ​ນໍາ​ໃຊ້​ຕາ​ປະ​ທັບ ເພື່ອເຮັດໃຫ້ໃນ​ການຈັດ​ຕັ້ງ​ປະຕິບັດ​ວຽກງານອົງການຈັດຕັ້ງສັງຄົມ ມີຄວາມຖືກຕ້ອງສອດຄ່ອງກັບ ກົດໝາຍລະບຽບການ ແລະ ຮັບປະກັນ​ຄວາມ​ພ້ອມ​ໃນ​ການ​ຮັບ​ໃຊ້​ປະຊາຊົນ​ຢ່າງ​ແທ້​ຈິງ.           ໃນໂອກາດດຽວກັນ​ນີ້, ຄະນະຮັບຜິດຊອບເຜີຍແຜ່ນິຕິກໍາກ່ຽວກັບວຽກງານອົງການຈັດຕັ້ງສັງຄົມ ​ຍັງ​​ໄດ້​ລົງເຄື່ອນໄຫວຢ້ຽມຢາມ ແລະ ​​ເຮັດ​ວຽກ ຢູ່ຫ້ອງການ ​ແລະ ສະຖານ​ທີ່​ເຮັດ​ວຽກ​ຕົວ​ຈິງຂອງ​ອົງການ​ຈັດ​ຕັ້ງ​ສັງຄົມທີ່ມີຢູ່ບັນດາແຂວງຕື່ມອີກຈໍານວນໜຶ່ງ.

Hits: 96

Leave a Reply

Your email address will not be published. Required fields are marked *