ກະຊວງພາຍໃນ

Ministry of Home Affairs

ເຜີຍແຜ່ຄໍາແນະນຳວຽກງານປະເມີນຜົນວຽກງານ 3 ສ້າງ ແລະ ວຽກງານແຂ່ງຂັນຮັກຊາດພັດທະນາ “ແຂວງຫົວພັນ”

ກອງປະຊຸມເຜີຍແຜ່ການຈັດຕັ້ງປະຕິບັດວຽກງານ 3 ສ້າງ ແລະ ວຽກງານແຂ່ງຂັນຮັກຊາດພັດທະນາໃນປີ 2020 ໄດ້ຈັດຂຶ້ນໃນວັນທີ 24 ມັງກອນ 2020 ທີ່ຫ້ອງວ່າການແຂວງຫົວພັນ ໂດຍໃຫ້ກຽດການເຂົ້າຮ່ວມຂອງທ່ານ ນ. ແພງ ກັນຍາພິມ ຮອງເລຂາພັກແຂວງ ຮອງເຈົ້າແຂວງຫົວພັນ, ທ່ານ ຄໍາມູນ ວິພົງໄຊ ຮອງລັດຖະມົນຕີກະຊວງພາຍໃນ, ມີພະແນກການອ້ອມຂ້າງແຂວງ ແລະ ພະນັກງານທີ່ກຽ່ວຂ້ອງເຂົ້າຮ່ວມ.

ເພື່ອສ້າງເມືອງເປັນຫົວໜ່ວຍເຂັມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ຕາມທີ່ໄດ້ກຳນົດໄວ້ໃນຄໍາສັ່ງເລກທີ 34 ຂອງນາຍົກລັດຖະມົນຕີ ເຊິ່ງໄດ້ກຳນົດຫຼັກການ, ກົນໄກວີທີການຕ່າງໆຢ່າງລະອຽດຈະແຈ້ງ ເປັນມາດຖານສຳຄັນໃນ ການຄົ້ນຄ້ວາ ແລະ ຈັດຕັ້ງປະຕິບັດວຽກງານຕົວຈິງ  ໃຫ້ມີຄວາມເປັນເອກະພາບກັນໃນ ຂອບເຂດທົ່ວປະເທດ ແລະ ເປັນບ່ອນອີງໃຫ້ແກ່ກະຊວງ, ອົງການ ຂັ້ນສູນກາງ ແລະ ທ້ອງຖິ່ນ ໃນການປະເມີນຜົນວຽກງານ 3 ສ້າງ  ໃຫ້ມີຄວາມຖືກຕ້ອງກັບສະພາບຄວາມເປັນຈິງ. ໂດຍມອບໃຫ້ ກະຊວງພາຍໃນ ເປັນຜູ້ຜົນຂະຫຍາຍຕິດຕາມ ແລະ ຊຸກຍູ້ວຽກງານດັ່ງກ່າວ.  ການສ້າງແຂວງເປັນຫົວໜ່ວຍຍຸດທະສາດ ປະກອບມີ 5 ດ້ານ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ປະກອບມີ 5 ດ້ານ ແລະ ສ້າງບ້ານເປັນຫົວໜ່ວຍພັດທະນາ ປະກອບມີ 4 ດ້ານ ໃນແຕ່ລະດ້ານຕ້ອງບັນລຸ 80 ສ່ວນຮ້ອຍຂື້ນໄປ, ການປະເມີນແມ່ນການຕິດຕາມການຈັດຕັ້ງປະຕິບັດວຽກງານໃດໜື່ງ ໃຫ້ຄົບຖ້ວນຕາມມາດຖານເງື່ອນໄຂ ແລະ ສໍາເລັດຕາມມາດຖານທີ່ໄດ້ກຳນົດໄວ້ ຈິ່ງສາມາດຮັບຮອງເປັນວຽກງານ 3 ສ້າງໄດ້.  

ໃນຕອນທ້າຍຂອງກອງປະຊຸມ ທ່ານ ຄໍາມູນ ວິພົງໄຊ ຮອງລັດຖະມົນຕີກະຊວງພາຍໃນ ໄດ້ໂອ້ລົມ ແລະ ເນັ້ນໃຫ້ການນຳແຕ່ລະພາກສ່ວນຕ້ອງເປັນເຈົ້າການໃນການຕິດຕາມ, ຊຸກຍູ້ ແລະ ຈັດຕັ້ງປະຕິບັດວຽກງານສາມສ້າງ, ຂະບວນການແຂ່ງຂັນຮັກຊາດ ແລະ ພັດທະນາ ໃຫ້ມີຄວາມເປັນເອກະພາບ, ຕິດພັນກັບການຈັດຕັ້ງປະຕິບັດວຽກງານວິຊາສະເພາະໃນຂະແໜງການຂອງຕົນ ໃຫ້ມີຜົນສຳເລັດ ,ເອົາໃຈໃສ່ໃນການເລືອກເຟັ້ນວຽກດີ, ຄົນເດັ່ນ ໂດຍຜ່ານຄະນະກຳມະການແຕ່ລະຂັ້ນ ແລະ ສະເໜີຍ້ອງຍໍໃຫ້ຖືກເປົ້າໝາຍ ຫຼີກລ້ຽງການຍ້ອງຍໍບໍ່ຖືກເປົ້າໝາຍ, ເອົາໃຈໃສ່ຢ່າງເຂັ້ມງວດໃນການສະຫຼຸບຕີລາຄາ ແລະ ຖອດຖອນບົດຮຽນໃນການຈັດຕັ້ງປະຕິບັດວຽກງານດັ່ງກ່າວໃຫ້ຂະແໜງການສາຍຕັ້ງ ແລະ ກອງເລຂາວຽກງານສາມສ້າງ ກໍ່ຄືພະແນກພາຍໃນ ເປັນຜູ້ສັງລວມໃຫ້ທັນຕາມກຳນົດເວລາ.

Hits: 17

Leave a Reply

Your email address will not be published. Required fields are marked *