ກະຊວງພາຍໃນ

Ministry of Home Affairs

ກອງປະຊຸມໃຫຍ່ ຄັ້ງທີ II ຂອງໜ່ວຍພັກສະຖາບັນຄົ້ນຄວ້າສະຖາບັນຄົ້ນຄວ້າວິທະຍາສາດການປົກຄອງ ແລະ ຝຶກອົບຮົມ

ກອງປະຊຸມໃຫ່ຍ ຄັ້ງທີ II ໜ່ວຍພັກສະຖາບັນຄົ້ນຄວ້າວິທະຍາສາດການປົກຄອງ ແລະ ຝຶກອົບຮົມ ກະຊວງພາຍໃນ ໄດ້ຈັດຂຶ້ນໃນວັນທີ 25 ກຸມພາ 2020 ນີ້ ໂດຍການເຂົ້າຮ່ວມ ຂອງ ສະຫາຍ ດຣ.ທອງຈັນ ມະນີໄຊ , ຄະນະພັກ ກະຊວງ , ຮອງລັດຖະມົນຕີກະຊວງພາຍໃນ ເຂົ້າຮ່ວມມີ ຄະ​ນະພັກ, ເລຂາ, ຮອງເລຂາໜ່ວຍພັກ ຈາກຫ້ອງການ, ບັນດາກົມ, ສະຖາບັນ, ສູນ, ຕາງໜ້າ 3 ອົງການຈັດຕັ້ງມະຫາຊົນກະຊວງພາຍໃນ ແລະ ສະມາຊິກສົມບູນ ແລະ ສຳຮອງຂອງໜ່ວຍພັກສະຖາບັນຄົ້ນຄວ້າວິທະຍາສາດການປົກຄອງ ແລະ ຝຶກອົບຮົມ ເຂົ້າຮ່ວມ.

ກອງປະຊຸມຄັ້ງນີ້ ໄດ້ສະຫຼຸບຕີລາຄາຄືນການຊີ້ນຳ-ນຳພາຮອບດ້ານກໍ່ຄືການເຄື່ອນໄຫວໃນການຈັດຕັ້ງປະຕິບັດພາລະບົດບາດ, ໜ້າທີ່ວິຊາສະເພາະໃນໄລຍະ 5 ປີ ຜ່ານມາ ຂອງໜ່ວຍພັກສະຖາບັນຄົ້ນຄວ້າວິທະຍາສາດການປົກຄອງ ແລະ ຝຶກອົບຮົມ ເພື່ອຍົກໃຫ້ເຫັນຜົນງານດ້ານດີທີ່ຈະຕ້ອງໄດ້ສືບຕໍ່ສົ່ງເສີມ ແລະ ຂໍ້ຄົງຄ້າງ ທີ່ໜ່ວຍພັກຈະຕ້ອງໄດ້ພ້ອມກັນຄົ້ນຄວ້າແກ້ໄຂໃນຕໍ່ໜ້າ ທີ່ໄດ້ສະແດງອອກໃນບົດລາຍງານການເມືອງຂອງໜ່ວຍພັກ ແລະ ບົດສໍາຫຼວດການນໍາພາລວມຂອງຄະນະໜ່ວຍພັກໃນໄລຍະ 5 ປີຜ່ານມາ ເຊິ່ງເປັນຂີດໝາຍສຳຄັນໃນການປັບປຸງບົດບາດການນຳພາຂອງຄະນະໜ່ວຍພັກ ແລະ ປັບປຸງຄຸນນະພາບຂອງບັນດາສະມາຊິກພາຍໃນໜ່ວຍພັກໃຫ້ເຂັ້ມແຂງ ແລະ ໜັກແໜ້ນຂຶ້ນກວ່າເກົ່າ.

        ນອກຈາກນັ້ນ ໃນກອງປະຊຸມ ຍັງໄດ້ຈັດໃຫ້ມີພິທີປ່ອນບັດຄັດເລືອກເອົາຄະນະໜ່ວຍພັກສະຖາບັນຄົ້ນຄວ້າວິທະຍາສາດການປົກຄອງ ແລະ ຝຶກອົບຮົມຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ,ຖືກຕ້ອງ ແລະ ສອດຄ່ອງກັບມາດຖານ, ເງື່ອນໄຂ ທີ່ໄດ້ກຳນົດໄວ້ ໂດຍກອງປະຊຸມໄດ້ເຫັນດີເປັນເອກະພາບ ເລືອກເອົາ ສະຫາຍ ນ. ຈັນທາ ອ່ອນໄຊວຽງ ເປັນ​ເລ​ຂາ​ໜ່ວຍ​ພັກ, ເລືອກເອົາ ສະຫາຍ ນ. ທອງບາ ສັກກະເສີມສຸກ ເປັນຮອງເລຂາໜ່ວຍພັກ ແລະ ເລືອກເອົາ ສະຫາຍ ສະຫວ່າງ ໄຊຍະວົງ ເປັນຄະນະ ພ້ອມທັງເປັນປະທານທັງກວດກາ.

ໃນຕອນທ້າຍກອງປະຊຸມ ສະຫາຍ ດຣ.ທອງຈັນ ມະນີໄຊ , ຄະນະພັກ, ຮອງລັດຖະມົນຕີກະຊວງພາຍໃນ ໄດ້ມີຄຳເຫັນໂອ້ລົມຕໍ່ກອງປະຊຸມ ໂດຍສະຫາຍໄດ້ ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດ ໃນການຊີ້ນຳ-ນຳພາ ຂອງຄະນະໜ່ວຍພັກຊຸດເກົ່າ ໃນໄລຍຜ່ານມາ ທີ່ໄດ້ຊີ້ນຳ-ນຳພາ ສະມາຊິກພັກ, ພະນັກງານ-ລັດຖະກອນ ເອົາໃຈໃສ່ ປະຕິບັດໜ້າທີ່ການເມືອງຂອງຕົນໄດ້ຮັບຜົນສຳເລັດ​ຫຼາຍດ້ານ ພ້ອມນັ້ນ ສະຫາຍ ໄດ້ເນັ້ນໃຫ້ຄະນະໜ່ວຍພັກ ຊຸດໃໝ່ ສືບຕໍ່ເອົາໃຈໃສ່ເພິ່ມທະວີວຽກງານສຶກສາອົບຮົມການເມືອງແນວຄິດ, ເອົາໃຈໃສ່ນຳພາ-ຊີ້ນຳ ສະພາຊິກພັກ, ພະນັກງານລັດຖະກອນ ຕັ້ງໜ້າປະຕິບັດໜ້າທີ່ການເມືອງດ້ວຍຄວາມຮັບຜິດຊອບສູງ ແລະ ສຳເລັດໜ້າທີ່ວິຊາສະເພາະຕາມພາລະບົດບາດ ແລະ ຕາມການມອບໝາຍຂອງຄະນະພັກ-ຄະນະນຳກະຊວງໃຫ້ບັນລຸຜົນສຳເລັດຕາມຄາດໝາຍທີ່ວາງໄວ້.

Hits: 0

Leave a Reply

Your email address will not be published. Required fields are marked *