ກະຊວງພາຍໃນ

Ministry of Home Affairs

3 ອົງການຈັດຕັ້ງມະຫາຊົນ ກະຊວງພາຍໃນ ເຂົ້າຮ່ວມບໍລິຈາກເລືອດ

ການບໍລິຈາກເລືອດ ແມ່ນເປັນວິທີການຊ່ວຍຊີວິດຜູ້ອື່ນ ທີ່ດີທີ່ສຸດທີ່ຄົນທົ່ວໄປສາມາດເຮັດໄດ້ ເຊິ່ງສາມາດຕໍ່ລົມຫາຍໃຈ ແລະ ກອບກູ້ເອົາຊີວິດຂອງ ຜູ້ທີ່ປະສົບພາວະຂາດເລືອດ ຈາກອຸປະຕິເຫດ ຫຼື ພະຍາດຕ່າງໆ ໃຫ້ສາມາດກັບມາດຳລົງຊີວິດຕໍ່ໄປໄດ້   ດັ່ງຄຳວ່າໃຫ້ເລືອດໃຫ້ຊີວິດ. ໃນວັນທີ 12 ມິຖຸນາ 2020 ຕາງໜ້າ 3 ອົງການຈັດຕັ້ງມະຫາຊົນ ກະຊວງພາຍໃນ ໄດ້ເຂົ້າຮ່ວມກິດຈະກຳບໍລິຈາກເລືອດ ເນື່ອງໃນໂອກາດວັນຜູ້ບໍລິຈາກເລືອດໂລກ (14 ມິຖຸນາ) ທີ່ຈັດຂຶ້ນຢູ່ສູນການຄ້າລາວໄອເຕັກ ນຳພາໂດຍ  ທ່ານ ຕ໋ອງ ພູມມີພັນ ຫົວໜ້າກົມກວດກາ ປະທານສະຫະພັນກຳມະບານ ກະຊວງພາຍໃນ ແລະ ທ່ານ ອາໂນລັກ ສິດທິເດດ ຮອງຫົວໜ້າກົມຄຸ້ມຄອງລັດຖະກອນ ເລຂາຄະນະບໍລິຫານງານຊາວໜຸ່ມປຊປລ ກະຊວງພາຍໃນ ພ້ອມດ້ວຍຕາງໜ້າສະມາຊິກ 3 ອົງການຈັດຕັ້ງມະຫາຊົນ ກະຊວງພາຍໃນ ຈຳນວນທັງໝົດ 14 ສະຫາຍ ເຂົ້າຮ່ວມໃນກິດຈະກຳດັ່ງກ່າວ. ພິທີສະເຫຼີມສະຫຼອງວັນຜູ້ບໍລິຈາກເລືອດໂລກ ຄົບຮອບ 15 ປີ ໃຫ້ກຽດເປັນປະທານ ຂອງ ທ່ານ ຄໍາຮຸ່ງ ເຮືອງວົງສີ ປະທານອົງການກາແດງລາວ ພ້ອມດ້ວຍຮອງປະທານອົງການກາແດງລາວ ຫົວໜ້າສູນເລືອດແຫ່ງຊາດ ຜູ້ຕາງໜ້າຈາກສຳນັກງານອົງການ ນັກຮຽນ-ນັກສຶກສາ ແລະ ຊາວນະຄອນຫຼວງວຽງຈັນເຂົ້າຮ່ວມ. ທ່ານ ຈັນທະລາ ສຸກສາຄອນ ຫົວໜ້າສູນເລືອດແຫ່ງຊາດ ກ່າວວ່າ: ວັນຜູ້ບໍລິຈາກເລືອດໂລກ 14 ມິຖຸນາ ຖືກຮັບຮອງ ແລະ ຕົກລົງໃນກອງປະຊຸມສະມັດຊາໃຫ່ຍ ອົງການອານາໄມໂລກ ປີ 2005 ໃຫ້ເປັນວັນຜູ້ບໍລິຈາກເລືອດໂລກທັງເປັນການລະນຶກຮູ້ບຸນຄຸນເຖິງຜູ້ບໍລິຈາກເລືອດໃນທົ່ວໂລກ ເປັນການກະຕຸກຊຸກຍູ້ ເຊີນຊວນໃນທົ່ວສັງຄົມໃຫ້ຮູ້ເຖິງຄວາມສຳຄັນຂອງການບໍລິຈາກເລືອດ.

ໃນປີ 2019 ບັນດາສູນເລືອດຢູ່ຂອບເຂດທົ່ວປະເທດ ໄດ້ຮ່ວມກັບການຈັດຕັ້ງຕ່າງໆທີ່ກ່ຽວຂ້ອງ ເຮັດການປຸກລະດົມ ແລະ ຈັດຮັບບໍລິຈາກເລືອດໄດ້ຫຼາຍກວ່າ 1.650 ຄັ້ງ ໄດ້ຮັບເລືອດຕົວຈິງ 55.000 ຖົງເຮັດໃຫ້ຈຳນວນຜູ້ບໍລິຈາກເລືອດແບບສະໝັກໃຈບໍ່ຮຽກຮ້ອງສິ່ງຕອບແທນ ໄດ້ກວມເອົາ 92% ຂອງການບໍລິຈາກເລືອດທັງໝົດ. ສຳລັບປີ 2020 ຄາດໝາຍສູ້ຊົນທົ່ວປະເທດຈະໃຫ້ບັນລຸ 60.700 ຖົງ ໂດຍແບ່ງຕົວເລກໃຫ້ແຕ່ລະແຂວງນຳໄປຈັດຕັ້ງປະຕິບັດຮ່ວມກັນ.

Hits: 0

Leave a Reply

Your email address will not be published. Required fields are marked *