ກະຊວງພາຍໃນ

Ministry of Home Affairs

ກົມຄຸ້ມຄອງພົນລະເມືອງ ກະຊວງພາຍໃນ ກວດກາໜ້າວຽກຮ້ອຍສ່ວນຮ້ອຍ (100%) ຂອງໂຄງການພັດທະນາລະບົບຄຸ້ມຄອງຂໍ້ມູນພົນລະເມືອງເອເລັກໂຕຣນິກ

ຕອນເຊົ້າວັນທີ 16 ມິຖຸນາ 2020 ນີ້ ກົມຄຸ້ມຄອງພົນລະເມືອງ ກະຊວງພາຍໃນ ໄດ້ຈັດກອງປະຊຸມກວດກາໜ້າວຽກຮ້ອຍສ່ວນຮ້ອຍ (100%) ຂອງໂຄງການພັດທະນາລະບົບຄຸ້ມຄອງຂໍ້ມູນພົນລະເມືອງເອເລັກໂຕຣນິກ ຂຶ້ນ ພາຍໃຕ້ການເຂົ້າຮ່ວມຂອງ ທ່ານ ປອ ທອງຈັນ ມະນີໄຊ ຄະນະປະຈຳພັກກະຊວງ ຮອງລັດຖະມົນຕີ ກະຊວງພາຍໃນ ແລະ ທ່ານ ລິວແມ໋ງ ຮ່າ ຜູ້ອໍານວຍການບໍລິສັດສະຕາໂທລະຄົມ, ມີຫົວໜ້າກົມ, ຮອງກົມຄຸ້ມຄອງພົນລະເມືອງ, ຕາງໜ້າຈາກຫ້ອງການ, ບັນດາກົມທີ່ຂຶ້ນກັບກະຊວງພາຍໃນ, ຕາງໜ້າຈາກກະຊວງການເງິນ, ກະຊວງແຜນການ ແລະ ການລົງທຶນ, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ແລະ ວິຊາການທີ່ກ່ຽວຂ້ອງຂອງກະຊວງພາຍໃນ ແລະ ບໍລິສັດສະຕາໂທລະຄົມ ເຂົ້າຮ່ວມ.

ໃນກອງປະຊຸມພາຍຫຼັງ ທ່ານ ປອ ທອງຈັນ ມະນີໄຊ ຮອງລັດຖະມົນຕີ ກະຊວງພາຍໃນ ໄດ້ມີຄໍາເຫັນເປີດກອງປະຊຸມຢ່າງເປັນທາງການແລ້ວ ທ່ານ ລິວແມ໋ງ ຮ່າ ຜູ້ອໍານວຍການບໍລິສັດສະຕາໂທລະຄົມ ໄດ້ຂຶ້ນລາຍງານກ່ຽວກັບສະພາບລວມຂອງການພັດທະນາລະບົບຖານຂໍ້ມູນຄຸ້ມຄອງພົນລະເມືອງ ແລະ ຜູ້ເຂົ້າຮ່ວມຍັງໄດ້ຮັບຟັງ ທ່ານ ນາງ ກົມມະລີ ວິລະພັນ ຫົວໜ້າກົມຄຸ້ມຄອງພົນລະເມືອງ ຂຶ້ນນໍາສະເໜີໂດຍຫຍໍ້ກ່ຽວກັບການຈັດຕັ້ງປະຕິບັດໂຄງການຖານຂໍ້ມູນຄຸ້ມຄອງພົນລະເມືອງ ໂດຍໄດ້ຍົກໃຫ້ເຫັນ: ສະພາບລວມໃນການຈັດຕັ້ງປະຕິບັດໂຄງການຕາມການເຊັນສັນຍາ ແລະ ການກໍານົດຂອບເຂດໜ້າວຽກ ເຊັ່ນ: ການສະໜອງພື້ນຖານໂຄງລ່າງລະບົບເຄືອຂ່າຍເຊື່ອມໂຍງ, ການຕິດຕັ້ງລະບົບຄຸ້ມຄອງຂໍ້ມູນພົນລະເມືອງ ແລະ ການຕິດຕັ້ງອຸປະກອນ ກໍ່ຄື ລະບົບຮາດແວຕ່າງ ແລະ ການຝຶກອົບຮົມນໍາໃຊ້ລະບົບດັ່ງກ່າວ ໂດຍໄລຍະຜ່ານມາໄດ້ຈັດຢູ່ກະຊວງພາຍໃນ, ພະແນກພາຍໃນແຂວງ 3 ແຂວງ ແລະ ຫ້ອງການພາຍໃນເມືອງ 31 ເມືອງ. ພ້ອມດຽວກັນນີ້, ຜູ້ເຂົ້າຮ່ວມກອງປະຊຸມຍັງໄດ້ຮັບຟັງຜູ້ຕາງໜ້າບໍລິສັດສະຕາໂທລະຄົມລາຍງານຜົນສໍາເລັດຂອງໜ້າວຽກທີ່ໄດ້ພັດທະນາລະບົບຖານຂໍ້ມູນຄຸ້ມຄອງພົນລະເມືອງໃນ ໄລຍະຜ່ານມາ ຕື່ມອີກ.

ໃນໂອກາດດຽວກັນນີ້, ຍັງໄດ້ຈັດໃຫ້ມີພິທີມອບ-ຮັບໂຄງການພັດທະນາລະບົບຄຸ້ມຄອງຂໍ້ມູນພົນລະເມືອງເອເລັກໂຕຣນິກ ໂດຍໃຫ້ກຽດເຊັນບົດບັນທຶກມອບ-ຮັບ ລະຫວ່າງ ທ່ານ ນາງ ກົມມະລີ ວິລະພັນ ຫົວໜ້າກົມຄຸ້ມຄອງພົນລະເມືອງ ກະຊວງພາຍໃນ ແລະ ທ່ານ ລິວແມ໋ງ ຮ່າ ຜູ້ອໍານວຍການບໍລິສັດສະຕາໂທລະຄົມ ໂດຍການຮ່ວມເປັນສັກຂີພິຍານ ຂອງທ່ານ ປອ ທອງຈັນ ມະນີໄຊ ຮອງລັດຖະມົນຕີ ກະຊວງພາຍໃນ ແລະ ບັນດາທ່ານຜູ້ຕາງໜ້າຈາກພາກສ່ວນຕ່າງໆທີ່ເຂົ້າຮ່ວມກອງປະຊຸມ ແລະ ວິຊາການກ່ຽວຂ້ອງຂອງທັງສອງຝ່າຍ ເຂົ້າຮ່ວມ.

Hits: 0

Leave a Reply

Your email address will not be published. Required fields are marked *