ກະຊວງພາຍໃນ

Ministry of Home Affairs

ສູນບໍລິຫານລັດດ້ວຍເອເລັກໂຕຣນິກ ມອບເຄື່ອງອຸປະກອນລະບົບກອງປະຊຸມທາງໄກ ໃຫ້ກະຊວງພາຍໃນ

ເພື່ອເຮັດໃຫ້ການປະຊຸມວຽກງານຕ່າງໆມີຄວາມສະດວກ, ວ່ອງໄວ, ທັນເວລາ ແລະ ປະຫຢັດເວລາ ພ້ອມທັງຄ່າໃຊ້ຈ່າຍໃນການເດີນທາງໄປຮ່ວມກອງປະຊຸມຢູ່ສະຖານທີ່ອື່ນໃນທົ່ວປະເທດ ໃນວັນທີ 04 ມິຖຸນາ 2020 ສູນບໍລິຫານລັດດ້ວຍເອເລັກໂຕຣນິກ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ມອບເຄື່ອງອຸປະກອນລະບົບກອງປະຊຸມທາງໄກ ໃຫ້ແກ່ກະຊວງພາຍໃນ ໂດຍການມອບຂອງທ່ານ ປອ ທະວີສັກ ມະໂນທັມ ຫົວໜ້າສູນບໍລິຫານລັດດ້ວຍເອເລັກໂຕຣນິກ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ແລະ ກ່າວຮັບໂດຍທ່ານ ສິງທະວອນ ດາລາວົງ ຄະນະພຸັກກະຊວງ ຫົວໜ້າຫ້ອງການ ກະຊວງພາຍໃນ, ມີຫົວໜ້າພະແນກ, ຮອງຫົວໜ້າພະແນກ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.

          ທ່ານ ປອ ທະວີສັກ ມະໂນທັມ ໄດ້ກ່າວຕໍ່ພິທີວ່າ ການປະຊຸມທາງໄກແມ່ນລະບົບສູນກາງການຈັດກອງປະຊຸມທາງໄກລະຫວ່າງສູນກາງ ແລະ ທ້ອງຖິ່ນ ເພື່ອອໍານວຍຄວາມສະດວກ, ວ່ອງໄວ ແລະ ປະຢັດເວລາຄ່າໃຊ້ຈ່າຍໃນການເດີນທາງ ໂດຍບໍ່ຕ້ອງເຂົ້າຫ້ອງປະຊຸມດຽວກັນ ເຊິ່ງກອງປະຊຸມທາງໄກ ຫຼື Video Conference ແມ່ນການນໍາເອົາເທັກໂນໂລຊີຕ່າງໆເປັນຕົ້ນແມ່ນ ຄອມພິວເຕີ, ກ້ອງ, ຈໍໂທລະພາບ ແລະ ລະບົບການສື່ສານໂທລະຄົມມະນາຄົມ ມາປະສົມປະສານເປັນການປະຊຸມ ທີ່ຜູ້ເຂົ້າຮ່ວມປະຊຸມຢູ່ຄົນລະສະຖານທີ່ ໂດຍບໍ່ຈໍາກັດໄລຍະທາງ, ສາມາດຕອບໂຕ້ກັນໄດ້. ນອກຈາກນີ້ ຍັງສາມາດສົ່ງເປັນຂໍ້ຄວາມພາບ, ສຽງ ແລະ ການພີເຊັນບົດຕ່າງໆຜ່ານລະບົບດັ່ງກ່າວໄດ້ໃນເວລາດຽວກັນ.

          ໂອກາດນີ້, ທ່ານ ສິງທະວອນ ດາລາວົງ ຄະນະພຸັກກະຊວງ ຫົວໜ້າຫ້ອງການ ກະຊວງພາຍໃນ ກໍໄດ້ກ່າວຂອບໃຈຕໍ່ ທ່ານ ປອ ທະວີສັກ ມະໂນທັມ ຫົວໜ້າສູນບໍລິຫານລັດດ້ວຍເອເລັກໂຕຣນິກ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ທີ່ເຫັນໄດ້ຄວາມສໍາຄັນຂອງວຽກງານຂະແໜງພາຍໃນ ເຊິ່ງເປັນວຽກທີ່ຕິດພັນກັບບັນດາພະແນກພາຍໃນແຂວງ, ນະຄອນຫຼວງ, ຫ້ອງການພາຍໃນເມືອງ ແລະ ກຸ່ມບ້ານຕ່າງໆ ເຮັດໃຫ້ການປະສານງານລະຫວ່າງສູນກາງ ກັບ ທ້ອງຖິ່ນ ມີຄວາມສະດວກສະບາຍ, ວ່ອງໄວ ແລະ ປະຢັດເວລາ ໂດຍບໍ່ໄດ້ເດີນທາງເພື່ອມາປະຊຸມຢູ່ຫ້ອງປະຊຸມດຽວກັນ; ສໍາລັບເຄື່ອງອຸປະກອນລະບົບກອງປະຊຸມທາງໄກ ທີ່ສູນບໍລິຫານລັດດ້ວຍເອເລັກໂຕຣນິກ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ນໍາມາມອບໃຫ້ຄັ້ງນີ້ມີມູນຄ່າທັງໝົດ 61.336.770 ກີບ ພ້ອມກັນນີ້ ກໍຍັງໄດ້ຝຶກວິທີການນໍາໃຊ້ໂດຍແມ່ນວິທະຍາກອນຈາກສູນບໍລິຫານລັດດ້ວຍເອເລັກໂຕຣນິກ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ.

Hits: 0

Leave a Reply

Your email address will not be published. Required fields are marked *