ກະຊວງພາຍໃນ

Ministry of Home Affairs

ພະແນກພາຍໃນແຂວງຫຼວງນໍ້າທາ ຖືກຮັບຮອງເປັນກໍາມະບານຮາກຖານ 05 ເປັນເຈົ້າ ສະໄໝທີ II

ວັນທີ 08 ກໍລະກົດ 2020 ນີ້ພະແນກພາຍໃນແຂວງຫຼວງນໍ້າທາ ໄດ້ຈັດກອງປະຊຸມຮັບຮອງກໍາມະບານຮາກຖານ 05 ເປັນເຈົ້າ ຂຶ້ນທີ່ຫ້ອງປະຊຸມຂອງພະແນກພາຍໃນ ໂດຍການເປັນປະທານຂອງສະຫາຍ ນາງ ໄພຈິດ ມອງປະດິດ ຮອງປະທານກໍາມະບານຮາກຖານ ພະແນກພາຍໃນ ໃຫ້ກຽດເຂົ້າຮ່ວມຂອງ ສະຫາຍ ສີສຸພັນ ທໍາປັນຍາ ເລຂາໝ່ວຍພັກ ຫົວໜ້າພະແນກພາຍໃນ ແລະ ສະຫາຍ ບຸນເລີດ ດ້ວງເງິນ ຮອງປະທານສະຫະພັນກໍາມະບານແຂວງ, ມີຮອງຫົວໜ້າພະແນກ, ຫົວໜ້າ, ຮອງຫົວໜ້າຂະແໜງ ແລະ ສະມາຊີກກໍາມະບານຮາກຖານ ພະແນກພາຍໃນ ເຂົ້າຮ່ວມ .

           ສະຫາຍ ນາງ ໄພຈິດ ມອງປະດິດ ຮອງປະທານກໍາມະບານຮາກຖານ ພະແນກພາຍໃນ ໄດ້ຜ່ານບົດສະຫຼຸບການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ 3 ປີຕໍ່ເນື່ອງ ແຕ່ປີ 2017–2019 ແລະ ທິດທາງແຜນການ ຂອງກໍາມະບານຮາກຖານພະແນກພາຍໃນ ໂດຍໄດ້ຕີລາຄາວ່າ ໃນໄລຍະ 3 ປີຜ່ານມາບັນດາສະຫາຍສະມາຊິກກໍາມະບານ ພະແນກພາຍໃນ ມີຄຸນທາດການເມືອງໝັກແໜ້ນ, ມີຄວາມຈົ່ງຮັກພັກດີ, ເຊື່ອໝັ້ນຕໍ່ການນໍາພາ ແລະ ຍຶດໝັ້ນຕໍ່ອຸດົມການຂອງພັກ, ເປັນເຈົ້າການໃນການຈັດຕັ້ງປະຕິບັດກົດລະບຽບພັກ, ກົດໝາຍຂອງລັດ, ກົດລະບຽບຂອງສະຫະພັນກໍາມະບານລາວ ແລະ ແຂ່ງຂັນກັນປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ເພື່ອສ້າງກໍາມະບານຮາກຖານໃຫ້ເຂັ້ມແຂງ-ຮູ້ນໍາພາຮອບດ້ານຂອງສະຫະພັນກໍາມະບານລາວ ຢ່າງເປັນຂະບວນຟົດຟື້ນ, ໄດ້ຕັ້ງໜ້າປະຕິບັດໜ້າທີ່ວຽກງານສະເພາະ ແລະ ໄດ້ຮັບການປັບປຸງແບບແຜນວິທີນໍາພາ, ວິທີເຮັດວຽກຕາມຫຼັກການລວມສູນປະຊາທິປະໄຕ ເຮັດວຽກເປັນໝູ່ຄະນະ. ປັດຈຸບັນກໍາມະບານຮາກຖານພະແນກພາຍໃນມີທັງໝົດ 31 ສະຫາຍ ຍິງ 13 ສະຫາຍ, ສະມາຊິກກໍາມະບານຮາກຖານພະແນກພາຍໃນ ໄດ້ເປັນເຈົ້າການ ແລະ ມີຄວາມຮັບຜິດຊອບໃນການປະຕິບັດຂໍ້ແຂ່ງຂັນ ຈຶ່ງເຮັດໃຫ້ສາມາດປະກາດ ເປັນກໍາມະບານຮາກຖານ 5 ເປັນເຈົ້າ ໄດ້ຢ່າງສະຫງ່າຜ່າເຜີຍ. ຜ່ານຂະບວນການດັ່ງກ່າວເຮັດໃຫ້ສະມາຊິກກໍາມະບານ 21 ສະຫາຍ ໄດ້ຮັບການຍ້ອງຍໍ ຈາກສູນກາງສະຫະພັນກໍາມະບານລາວແລະ ທິດທາງແຜນການຕໍ່ໜ້າ ຈະປະຕິບັດພາລະບົດບາດໜ້າທີ່ເປັນເສນາທິການໃຫ້ແກ່ຄະນະພັກ ໃນວຽກງານກໍາມະບານ ກໍ່ຄືວຽກງານວິຊາສະເພາະໃຫ້ມີປະສິດທິຜົນສູງກ່ວາເກົ່າ.

          ໃນຕອນທ້າຍກອງປະຊຸມ ສະຫາຍ ບຸນເລີດ ດ້ວງເງິນ ຮອງປະທານສະຫະພັນກໍາມະບານແຂວງ ໄດ້ໂອ້ລົມຕໍ່ກອງປະຊຸມວ່າ ໃຫ້ເອົາໃຈໃສ່ຮັກສາມູນເຊື້ອອັນດີງາມຂອງກໍາມະບານຮາກຖານພະແນກພາຍໃນ, ມີຄວາມຮັບຜິດຊອບສູງໃນການປະຕິບັດໜ້າທີ່ວຽກງານ, ເພີ່ມທະວີຄວາມສາມັກຄີພາຍໃນ ແລະ ມີຄວາມເປັນເອກະພາບໃນການຈັດຕັ້ງປະຕິບັດໜ້າທີ່ວຽກງານ, ສືບຕໍ່ຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ເປັນມາດຖານໃນການສ້າງຮາກຖານກໍາມະບານ ໃຫ້ເຂັ້ມແຂງ ຕິດພັນກັບການກໍ່ສ້າງໝ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ຂອງພັກວາງອອກ ໃຫ້ປະກົດຜົນເປັນຈິງ.

Hits: 0

Leave a Reply

Your email address will not be published. Required fields are marked *