ກະຊວງພາຍໃນ

Ministry of Home Affairs

ສະຫະພັນແມ່ຍິງກະຊວງພາຍໃນ ສ້າງຂີດຄວາມສາມາດໃຫ້ຜູ້ຮັບຜິດຊອບວຽກງານ 03 ດີ

ເພື່ອບັນລຸຈຸດໝາຍການພັດທະນາແມ່ຍິງໃນການຈັດຕັ້ງຜັນຂະຫຍາຍເນື້ອໃນຄໍາຂວັນຂອງຂໍ້ແຂ່ງຂັນ 03 ດີ ຕາມແຜນການທີ່ວາງໄວ້, ສະຫະພັນແມ່ຍິງ ກະຊວງພາຍໃນ ໄດ້ຈັດກອງປະຊຸມສ້າງຂີດຄວາມສາມາດໃຫ້ຜູ້ຮັບຜິດຊອບວຽກງານ 03 ດີ ຂອງສະຫະພັນແມ່ຍິງກະຊວງພາຍໃນ ຂຶ້ນໃນວັນທີ 10 ກໍລະກົດ 2020 ນີ້ໂດຍການເປັນປະທານຂອງສະຫາຍ ນ. ຄໍາພູນ ແກ້ວສະຫວັນ ປະທານສະຫະພັນແມ່ຍິງ ກະຊວງພາຍໃນ, ມີບັນດາຄະນະໜ່ວຍ ແມ່ຍິງຂອງຫ້ອງການ, ບັນດາກົມ, ສະຖາບັນ ແລະ ສູນ ທີ່ສັງກັດກະຊວງພາຍໃນ ເຂົ້າຮ່ວມ.

          ສະຫາຍ ນ. ຄໍາພູນ ແກ້ວສະຫວັນ ປະທານສະຫະພັນແມ່ຍິງກະຊວງພາຍໃນ ໄດ້ກ່າວວ່າ: ການຈັດກອງປະຊຸມໃນຄັ້ງນີ້ ກໍເພື່ອສ້າງຄວາມຮັບຮູ້ ແລະ ເຂົ້າໃຈໃນວຽກງານຂໍ້ແຂ່ງຂັນ 03 ດີ ໃຫ້ເລິກເຊິ່ງ ແລະ ຈັດຕັ້ງປະຕິບັດຂໍ້ແຂ່ງຂັນ 03 ດີ ໃຫ້ຖືກຕ້ອງ ແລະ ບັນລຸຜົນຕາມຄາດໝາຍ ທັງເປັນການສ້າງ ແລະ ປັບປຸງການຈັດຕັ້ງສະຫະພັນແມ່ຍິງແຕ່ລະຂັ້ນ ໃຫ້ມີຄວາມໜັກແໜ້ນເຂັ້ມແຂງ ເພື່ອພັດທະນາຕົນເອງໃຫ້ກາຍເປັນຕົວແທນແຫ່ງການປົກປ້ອງສິດ, ຜົນປະໂຫຍດອັນຊອບທໍາຂອງສະມາຊິກແມ່ຍິງ, ແມ່ ແລະ ເດັກນ້ອຍ, ສາມາດຈັດຕັ້ງປະຕິບັດວຽກງານໃນຂົງເຂດທີ່ຕົນຮັບຜິດຊອບໃຫ້ປະກົດຜົນສໍາເລັດ ທຽບເທົ່າກັບເພດຊາຍ ຈົນກ້າວໄປເຖິງການພັດທະນາປະເທດຊາດ ກໍຄື 02 ໜ້າທີ່ຍຸດທະສາດ: ປົກປັກຮັກສາ ແລະ ສ້າງສາປະເທດຊາດ.

          ໃນກອງປະຊຸມ ສະຫາຍ ນ. ຄອນສະຫວັນ ວໍຣະລາດ ຄະນະບໍລິຫານງານສະຫະພັນແມ່ຍິງກະຊວງພາຍໃນ ຫົວໜ້າໜ່ວຍງານວຽກງານ 03 ດີ ສະຫະພັນແມ່ຍິງກະຊວງພາຍໃນ ໄດ້ຜ່ານເນື້ອໃນຂໍ້ແຂ່ງຂັນ 03 ດີ ໂດຍໄດ້ເນັ້ນໃຫ້ຄະນະໜ່ວຍແມ່ຍິງແຕ່ລະພາກສ່ວນໃຫ້ເອົາໃຈໃສ່ໃນການສ້າງບຸກຄະລາກອນເພດຍິງເພື່ອສືບທອດປ່ຽນແທນ, ເປັນເຈົ້າການໃນການອານຸລັກ, ສົ່ງເສີມມູນເຊື້ອວັດທະນາທໍາອັນດີງາມຂອງຊາດ ແລະ ມູນເຊື້ອທີ່ເປັນເອກະລັກສະເພາະຂອງແມ່ຍິງລາວບັນດາເຜົ່າ. ເຊິ່ງການຈັດຕັ້ງປະຕິບັດຂໍ້ແຂ່ງຂັນ 03 ດີ ຈະໄດ້ມີການປະເມີນຜົນໃນທ້າຍເດືອນພະຈິກ 2020 ນີ້.

Hits: 0

Leave a Reply

Your email address will not be published. Required fields are marked *