ກະຊວງພາຍໃນ

Ministry of Home Affairs

ສ້າງຄວາມເຂັ້ມແຂງໃນການນຳໃຊ້ລະບົບຄຸ້ມຄອງຂໍ້ມູນລັດຖະກອນ ແບບເອເລັກໂຕຣນິກ

ພະແນກພາຍໃນແຂວງຊຽງຂວາງ ໄດ້ຈັດກອງປະຊຸມຝຶກອົບຮົມການນຳໃຊ້ລະບົບຄຸ້ມຄອງຂໍ້ມູນລັດຖະ ກອນ ແບບເອເລັກໂຕຣນິກ ຂຶ້ນ ໃນວັນທີ 27 ກໍລະກົດ 2020 ໂດຍການເປັນປະທານຮ່ວມຂອງ ທ່ານ ສຸວັນນີ ລັດຕະນະວົງ ຫົວໜ້າກົມຄຸ້ມຄອງລັດຖະກອນ ກະຊວງພາຍໃນ ແລະ ທ່ານ ສີທອນ ສໍບົວລະພາ ຫົວໜ້າພະແນກພາຍໃນ ແຂວງຊຽງຂວາງ ມີພະນັກງານຈາກບັນດາພະແນກການ ແລະ ອົງການທຽບເທົ່າ ອ້ອມຂ້າງແຂວງ ຈໍານວນ 34 ພາກສ່ວນ ເຂົ້າຮ່ວມ.

ການຈັດຝຶກອົບຮົມໃນຄັ້ງນີ້ ຈະໄດ້ດໍາເນີນເປັນເວລາ 5 ວັນ ເລີ່ມແຕ່ວັນທີ 27-31 ກໍລະກົດ 2020 ເຊິ່ງຜູ້ເຂົ້າຮ່ວມຈະໄດ້ຮັບຮູ້ ແລະ ເຂົ້າໃຈ  ໃນການນໍາໃຊ້ລະບົບຄຸ້ມຄອງຂໍ້ມູນລັດຖະກອນ ແບບເອເລັກໂຕຣນິກ ໃນການຈັດຕັ້ງປະຕິບັດວຽກງານ ເປັນຕົ້ນແມ່ນ ການເລື່ອນຊັ້ນ-ຂັ້ນ, ການສະເໜີຍົກຍ້າຍ, ການດັດແກ້ຂໍ້ມູນ, ການຮັບອຸດໜູນໃໝ່, ການຢຸດເຊົາອຸດໜູນ, ການຜ່ານບັນຊີຈໍານວນພົນ, ການຄິດໄລ່ເງິນເດືອນ ແລະ ອື່ນໆ ໃຫ້ເປັນລະບົບທີ່ທັນສະໄໝ, ມີຄວາມເປັນເອກະພາບ ແລະ ສາມາດຄຸ້ມຄອງຂໍ້ມູນທີ່ຢູ່ໃນຂົງເຂດຄວາມຮັບຜິດຊອບຂອງຕົນໄດ້ຢ່າງຖືກຕ້ອງ, ຊັດເຈນ ແລະ ສະດວກວ່ອງໄວ ຂຶ້ນກວ່າເກົ່າ.

ທ່ານ ສີທອນ ສໍບົວລະພາ ຫົວໜ້າພະແນກພາຍໃນແຂວງຊຽງຂວາງ ໄດ້ມີຄຳເຫັນຕໍ່ຊຸດຝຶກອົບຮົມວ່າ: ການຈັດຝຶກອົບຮົມນີ້ ມີຄວາມໝາຍສໍາຄັນຢ່າງຍິ່ງ ເພື່ອຫັນເອົາລະບົບຄຸ້ມຄອງຂໍ້ມູນລັດຖະກອນ ທີ່ທັນສະໄໝ ເຂົ້າໃນວຽກງານຄຸ້ມຄອງລັດຖະກອນ ໃຫ້ມີຄວາມວ່ອງໄວ ແລະ ທັນສະໄໝ ພ້ອມທັງຮັບປະກັນທາງດ້ານຄວາມປອດໄພ, ຄວາມຖືກຕ້ອງ ແລະ ມີຄວາມເປັນເອກະພາບໃນການຈັດຕັ້ງປະຕິບັດ. ພ້ອມນີ້, ທ່ານຍັງໄດ້ຮຽກຮ້ອງໃຫ້ຜູ້ເຂົ້າຮ່ວມ ຈົ່ງເອົາໃຈໃສ່ໃນການຄົ້ນຄວ້າ ແລກປ່ຽນບົດຮຽນທາງດ້ານວິຊາການຢ່າງພາວະວິໄສ ຍົກບັນຫາດ້ານດີ ຂໍ້ຫຍຸ້ງຍາກ ແລະ ຊອກຫາວິທີການແກ້ໄຂ ຢ່າງກົງໄປກົງມາ ແລະ ດ້ວຍຄວາມຮັບຜິດຊອບສູງ ເພື່ອນຳເອົາບົດຮຽນທີ່ໄດ້ຮັບໄປຈັດຕັ້ງຜັນຂະຫຍາຍເຂົ້າໃນວຽກງານຕົວຈິງ ໃຫ້ມີປະສິດທິພາບ ແລະ ປະສິດທິຜົນຂຶ້ນ.

ກອງປະຊຸມຝຶກອົບຮົມຄັ້ງນີ້ ນອກຈາກຜູ້ເຂົ້າຮ່ວມຈະໄດ້ຮຽນຮູ້ດ້ານທິດສະດີແລ້ວ ຍັງຈະໄດ້ເຮັດພາກປະ ຕິບັດຕົວຈິງໃນການທົດລອງປ້ອນຂໍ້ມູນຈາກແບບຟອມຂໍ້ມູນລັດຖະກອນ ລົງຖານຂໍ້ມູນລັດຖະກອນ​ ແລະ ທົດລອງເຮັດບັນຊີຈຳນວນພົນຕົວຈິງ ຜ່ານລະບົບຄຸ້ມຄອງຂໍ້ມູນລັດຖະກອນ ຕື່ມອີກ. ໃນໂອກາດນີ້  ທ່ານ ສຸວັນນີ ລັດຕະນະວົງ ຫົວໜ້າກົມຄຸ້ມຄອງລັດຖະກອນ ໄດ້ຕາງໜ້າໃຫ້ຄະນະພັກ-ຄະນະນຳ ກະຊວງພາຍໃນ ມອບຄອມພິວເຕີ ແລະ ອຸປະກອນໄອທີ ຈຳນວນ 01 ຊຸດ ເພື່ອຮັບໃຊ້ເຂົ້າໃນວຽກງານຄຸ້ມຄອງລັດຖະກອນ ແບບເອເລັກໂຕຣນິກ ຕາງໜ້າຮັບໂດຍ ທ່ານ ສີທອນ ສໍບົວລະພາ ຫົວໜ້າພະແນກພາຍໃນ ແຂວງຊຽງຂວາງ.

Hits: 0

Leave a Reply

Your email address will not be published. Required fields are marked *