ກະຊວງພາຍໃນ

Ministry of Home Affairs

ໜ່ວຍພັກສູນສໍາຫຼວດ ວັດແທກ ແລະ ແຜ່ນທີ່ ເລືອກຄະນະໜ່ວຍພັກຊຸດໃໝ່

ກອງປະຊຸມໃຫ່ຍ ຄັ້ງທີ II  ໜ່ວຍພັກສູນສໍາຫຼວດວັດແທກ ແລະ ແຜນທີ່ ໄດ້ຈັດຂຶ້ນໃນວັນທີ 03 ກໍລະກົດ  2020  ໂດຍການໃຫ້ກຽດເຂົ້າຮ່ວມ ຂອງ ສະຫາຍ ຄໍາໝັ້ນ ສູນວິເລີດ ກໍາມະການສູນກາງພັກ ເລຂາຄະນະພັກ ລັດຖະມົນຕີກະຊວງພາຍໃນ ແລະ ສະຫາຍ ປອ ທອງຈັນ ມະນີໄຊ ຄະນະປະຈຳພັກ ຮອງລັດຖະມົນຕີກະຊວງພາຍໃນ ມີ ເລຂາ, ຮອງເລຂາໜ່ວຍພັກ ຈາກຫ້ອງການ, ບັນດາກົມ, ສະຖາບັນ, ຕາງໜ້າ 3 ອົງການຈັດຕັ້ງມະຫາຊົນກະຊວງພາຍໃນ, ສະມາຊິກພັກສົມບູນ ແລະ ສຳຮອງຂອງໜ່ວຍພັກສູນສໍາຫຼວດວັດແທກ ແລະ ແຜນທີ່ ເຂົ້າຮ່ວມ.

ກອງປະຊຸມຄັ້ງນີ້ ສະຫາຍ ປອ ກອງຄໍາ ສຸລິຍາ ເລຂາໜ່ວຍພັກ ຫົວໜ້າສູນສໍາຫຼວດວັດແທກ ແລະ ແຜນທີ່ ໄດ້ຜ່ານບົດລາຍງານການເມືອງ ແລະ ບົດສໍາຫຼວດການນໍາພາລວມຂອງຄະນະໜ່ວຍພັກໃນໄລຍະ 5 ປີຜ່ານມາ ເຊິ່ງຍົກໃຫ້ເຫັນຜົນສຳເລັດ ທີ່ຈະຕ້ອງໄດ້ສືບຕໍ່ສົ່ງເສີມ ແລະ ດ້ານອ່ອນ, ຂໍ້ຄົງຄ້າງ ທີ່ໜ່ວຍພັກຈະຕ້ອງໄດ້ພ້ອມກັນຄົ້ນຄວ້າແກ້ໄຂໃນຕໍ່ໜ້າ ເຊິ່ງລ້ວນແຕ່ມີຄວາມໝາຍຄວາມສຳຄັນ ໃນການສືບຕໍ່ປັບປຸງຍົກບົດບາດການນຳພາຂອງຄະນະໜ່ວຍພັກ ແລະ ປັບປຸງຄຸນນະພາບຂອງບັນດາສະມາຊິກພາຍໃນໜ່ວຍ ໃຫ້ມີຄວາມເຂັ້ມແຂງ ແລະ ໜັກແໜ້ນທາງດ້ານການເມືອງງ-ແນວຄິດ ສູງຂຶ້ນກວ່າເກົ່າ ເພື່ອຮອງຮັບໃຫ້ແກ່ການເຕີບໃຫ່ຍຂະຫຍາຍຕົວຂອງວຽກງານໃນຕໍ່ໜ້າ.

       ນອກຈາກນັ້ນ, ກອງປະຊຸມ ຍັງໄດ້ຈັດໃຫ້ມີພິທີປ່ອນບັດຄັດເລືອກເອົາຄະນະໜ່ວຍພັກສູນສໍາຫຼວດວັດແທກ ແລະ ແຜ່ນທີ່ ຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ, ຖືກຕ້ອງ ແລະ ສອດຄ່ອງກັບມາດຖານ, ເງື່ອນໄຂ ທີ່ໄດ້ກຳນົດໄວ້ ໂດຍກອງປະຊຸມໄດ້ເຫັນດີເປັນເອກະພາບ ເລືອກເອົາ ສະຫາຍ ປອ ກອງຄໍາ ສຸລິຍາ ເປັນ​ເລ​ຂາ​ໜ່ວຍ​ພັກ, ເລືອກເອົາ ສະຫາຍ ບົວວັນ ພຸດທະວົງ ເປັນຮອງເລຂາໜ່ວຍພັກ ພ້ອມທັງ ເລືອກເອົາ ສະຫາຍ ສາຍຄໍາ ສີຫາລາດ ເປັນກຳມະການພັກ ທັງເປັນຜູ້ກວດກາໜ່ວຍພັກ, ສະຫາຍ ບຸດດີ ແພງເໝາະ ແລະ ສະຫາຍ ອິມພອນ ຈັນງາຄໍາ ເປັນຄະນະ.

ໃນຕອນທ້າຍກອງປະຊຸມ ສະຫາຍ ຄໍາໝັ້ນ ສູນວິເລີດ ກໍາມະການສູນກາງພັກ ເລຂາພັກກະຊວງ ລັດຖະມົນຕີກະຊວງພາຍໃນ ໄດ້ມີຄຳເຫັນໂອ້ລົມຕໍ່ກອງປະຊຸມ ໂດຍສະຫາຍໄດ້ ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດ ໃນການຊີ້ນຳ-ນຳພາ ຂອງຄະນະໜ່ວຍພັກຊຸດເກົ່າ ທີ່ໄດ້ຊີ້ນຳ-ນຳພາ ສະມາຊິກພັກ, ພະນັກງານ-ລັດຖະກອນ ເອົາໃຈໃສ່ປະຕິບັດໜ້າທີ່ການເມືອງຄຽງຄູ່ກັບວຽກງານວິຊາສະເພາະຂອງຕົນຢ່າງຫ້າວຫັນ ສາມາດຍາດໄດ້ຜົນສຳເລັດ​ຫຼາຍດ້ານ ພ້ອມນັ້ນ ສະຫາຍ ຍັັງໄດ້ເນັ້ນ ໃຫ້ຄະນະໜ່ວຍພັກຊຸດໃໝ່ ຈົ່ງເອົາໃຈໃສ່ເພີ່ມທະວີວຽກງານສຶກສາອົບຮົມການເມືອງແນວຄິດໃຫ້ແກ່ສະມາຊິກພັກ, ພະນັກງານ-ລັດຖະກອນ ເຊື່ອມຊຶມ ແລະ ກຳແໜ້ນແນວທາງນະໂຍບາຍຂອງພັກລະບຽບກົດໝາຍຂອງລັດ ຢຶດໝັ້ນແບບແຜນນຳພາ ແລະ ວິທີເຮັດວຽກຕາມຫຼັກການລວມສູນປະຊາທິປະໄຕ ເອົາໃຈໃສ່ຊີ້ນຳ-ນຳພາ ການເຄື່ອນໄຫວວຽກງານວິຊາສະເພາະຕາມພາລະບົດບາດ ແລະ ສິດໜ້າທີ່ ທີ່ໄດ້ຮັບມອບໝາຍດ້ວຍຄວາມຮັບຜິດຊອບສູງ. ນອກນັ້ນ ສະຫາຍຍັງຮຽກຮ້ອງໃຫ້ ສະມາຊິກພັກທຸກສະຫາຍ ຕ້ອງໄດ້ສືບຕໍ່ສູ້ຊົນຈັດຕັ້ງປະຕິບັດໜ້າທີ່ການເມືອງຕິດພັນກັບວຽກງານວິຊາສະເພາະ ເຄື່ອນໄຫວວຽກງານຮອບດ້ານຂອງສູນ ໃຫ້ສຳເລັດຜົນຕາມຄາດໝາຍທີ່ວາງໄວ້ ເພື່ອໃຫ້ກາຍເປັນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ.

Hits: 0

Leave a Reply

Your email address will not be published. Required fields are marked *