ກະຊວງພາຍໃນ

Ministry of Home Affairs

ພິທີປະກາດກົງຈັກການຈັດຕັ້ງ ຂອງ ກະຊວງພາຍໃນ

ເພື່ອເຮັດໃຫ້ກົງຈັກການຈັດຕັ້ງ ກະຊວງພາຍໃນ ກະທັດຮັດ, ໜັກແໜ້ນ, ສົມເຫດສົມຜົນ ເຂັ້ມແຂງສອດຄ່ອງກັບການປະຕິບັດວຽກງານຕົວຈິງ ຖືກຕ້ອງຕາມທິດຊີ້ນຳຂອງຂັ້ນເທິງ ໃນວັນທີ 31 ກໍລະກົດ 2020 ກະຊວງພາຍໃນ ໄດ້ຈັດພິທີປະກາດກົງຈັກການຈັດຕັ້ງ ຂອງ ກະຊວງພາຍໃນ ໂດຍການເປັນປະທານຂອງ          ທ່ານ ຄຳໝັ້ນ ສູນວິເລີດ ກຳມະການສູນກາງພັກ ເລຂາຄະນະພັກ ລັດຖະມົນຕີກະຊວງພາຍໃນ ມີຄະນະຫ້ອງການ, ບັນດາກົມ, ສະຖາບັນ, ສູນ ແລະ ພະນັກງານ-ລັດຖະກອນ ຂອງ ຫ້ອງການ ແລະ ກົມແຜນການແລະ ການຮ່ວມມື ເຂົ້າຮ່ວມ.

ໃນພິທີດັ່ງກ່າວ ທ່ານ ບຸນຍົງ ສີສຸພັນ ຫົວໜ້າກົມຈັດຕັ້ງ ແລະ ພະນັກງານ ໄດ້ຂຶ້ນຜ່ານດຳລັດຂອງນາຍົກລັດຖະມົນຕີວ່າດ້ວຍການຊັບຊ້ອນກົງຈັກການຈັດຕັ້ງຂອງ ກະຊວງພາຍໃນ,  ຂໍ້ຕົກລົງວ່າດ້ວຍການປັງປຸງກົງ ຈັກການຈັດຕັ້ງຂອງຫ້ອງການ, ມະຕິຕົກລົງວ່າດ້ວຍການຍຸກເລີກໜ່ວຍພັກກົມແຜນການ ແລະ ການຮ່ວມມື ກະຊວງພາຍໃນ, ຂໍ້ຕົກລົງຂອງລັດຖະມົນຕີວ່າດ້ວຍການຊັບຊ້ອນຈັດວາງພະນັກງານຂອງກະຊວງພາຍໃນ.

ການປັບປຸງຊັບຊ້ອນກົງຈັດການຈັດຕັ້ງຂອງ ກະຊວງພາຍໃນຄັ້ງນີ້ ແມ່ນການໂຮມສອງພາກສ່ວນທີ່ບັນດາວຽກງານທີ່ຄ້າຍຄືເຂົ້າກັນ ໂດຍການຍຸບເລີກ ກົມແຜນການ ແລະ ການຮ່ວມມື ແລ້ວຊັບຊ້ອນບັນດາໜ້າວຽກແຜນການ ແລະ ການຮ່ວມມື ເຂົ້າກັບ ຫ້ອງການກະຊວງພາຍໃນ ເຊິ່ງໄດ້ໂຮມກົງຈັກການຈັດການຈັດຕັ້ງຂອງຫ້ອງການ ແລະ ກົມແຜນການ ແລະ ການຮ່ວມມື ເຂົ້າເປັນການຈັດຕັ້ງດຽວ ເຊິ່ງປະກອບມີ 05 ພະແນກ ຄື: ພະແນກແຜນການ-ການເງິນ, ພະແນກປະຊາສຳພັນ, ຂໍ້ມູນຂ່າວສານ ແລະ ສະຖິຕິ, ພະແນກພົວພັນ ແລະ ຮ່ວມມືສາກົນ, ພະແນກສັງລວມ ແລະເລຂານຸການ, ພະແນກບໍລິຫານ ແລະ ຄຸ້ມຄອງ ທີ່ຂຶ້ນກັບ ຫ້ອງການກະຊວງພາຍໃນ.

ໃນໂອກາດນີ້ ທ່ານ ຄຳໝັ້ນ ສູນວິເລີດ ກຳມະການສູນກາງພັກ ເລຂາຄະນະພັກ ລັດຖະມົນຕີ ກະຊວງພາຍໃນ ໃຫ້ກຽດມີຄຳເຫັນໂອ້ລົມ ເຊິ່ງທ່ານໄດ້ຮຽກຮ້ອງໃຫ້ ຄະນະພັກກະຊວງ, ຄະນະໜ່ວຍພັກ, ຄະນະຫ້ອງການ, ບັນດາກົມ, ສະຖາບັນ ແລະ ສູນ ພ້ອມດ້ວຍສະມາຊິກພັກ, ແລະ ພະນັກງານ-ລັດຖະກອນທັງໝົດ ຈົ່ງເສີມຂະຫຍາຍມູນເຊື້ອຄວາມສາມັກຄີເປັນປຶກແຜ່ນ, ເຊື່ອໝັ້ນຕໍ່ການນຳພາຂອງພັກ, ການຄຸ້ມຄອງລັດ, ບຸກໜ້າບືນຕົວຜ່ານຜ່າອຸປະສັກຄວາມຫຍຸ້ງຍາກ, ເສີມຂະຫຍາຍຫົວຄິດປະດິດສ້າງ, ເປັນເຈົ້າການ ແລະ ສູ້ຊົນປະຕິບັດໜ້າທີ່ການເມືອງ, ວຽກງານວິຊາສະເພາະທີ່ໄດ້ຮັບມອບໝາຍໃຫ້ມີຜົນສຳເລັດ, ເອົາໃຈໃສ່ກະກຽມດຳເນີນກອງປະຊຸມໃຫ່ຍຄັ້ງທີ II ຂອງອົງຄະນະພັກກະຊວງພາຍໃນ ແລະ ກອງປະຊຸມໃຫ່ຍຂອງໜ່ວຍພັກຮາກຖານທີ່ຍັງບໍ່ທັນໄດ້ດຳເນີນໃຫ້ສຳເລັດຕາມຄາດໝາຍທີ່ວາງໄວ້. ປະຈຸບັນ ໂຄງປະກອບກົງຈັກ ກະຊວງພາຍໃນ ປະກອບມີ 14 ກົມ ແລະ ທຽບເທົ່າ ຄື: ຫ້ອງການ, ກົມຈັດຕັ້ງ ແລະ ພະນັກງານ, ກົມກວດກາ, ກົມພັດທະນາການບໍລິຫານລັດ, ກົມການປົກຄອງທ້ອງຖິ່ນ, ກົມຄຸ້ມຄອງລັດຖະກອນ, ກົມແຜນທີ່ແຫ່ງຊາດ, ກົມເອກະສານແຫ່ງຊາດ, ກົມແຂ່່ງຂັນ ແລະ ຍ້ອງຍໍ. ກົມປະເມີນຜົນ ແລະ ພັດທະນາລັດຖະກອນ, ກົມຄຸ້ມຄອງພົນລະເມືອງ, ກົມຊົນເຜົ່າ ແລະ ສາສະໜາ, ສະຖາບັນຄົ້ນຄວ້າວິທະຍາສາດການປົກຄອງ ແລະ ຝຶກອົບຮົມ ແລະ ສູນສຳຫຼວດວັດແທກ ແລະ ແຜນທີ່.

Hits: 0

Leave a Reply

Your email address will not be published. Required fields are marked *