ກະຊວງພາຍໃນ

Ministry of Home Affairs

ກະຊວງພາຍໃນ ໄດ້ຈັດກອງປະຊຸມປຶກສາຫາລື ກ່ຽວກັບການສະຫຼຸບການຈັດຕັ້ງປະຕິບັດຍຸດທະສາດ ຕ້ານການສໍ້ລາດບັງຫຼວງ ແຕ່ປີ 2013-2020 ຂຶ້ນໃນວັນທີ 30 ຕຸລາ 2020

ກະຊວງພາຍໃນ ໄດ້ຈັດກອງປະຊຸມປຶກສາຫາລື ກ່ຽວກັບການສະຫຼຸບການຈັດຕັ້ງປະຕິບັດຍຸດທະສາດ ຕ້ານການສໍ້ລາດບັງຫຼວງ ແຕ່ປີ 2013-2020 ຂຶ້ນໃນວັນທີ 30 ຕຸລາ 2020 ໂດຍການເປັນປະທານຮ່ວມຂອງທ່ານ ຕ໋ອງ ພູມມີພັນ ຮອງປະທານຄະນະກວດກາພັກກະຊວງ ຫົວໜ້າກົມກວດກາ ກະຊວງພາຍໃນ ແລະ ທ່ານ ເທບພະໄທ ພັນກ້າ ຮອງຫົວໜ້າກົມກວດກາຕ້ານການສໍ້ລາດບັງຫຼວງ ອົງການກວດກາລັດຖະບານ, ມີບັນດາຜູ້ຮັບຜິດຊອບວຽກງານກວດກາພັກ, ກວດກາລັດ ຈາກບັນດາໜ່ວຍພັກ ແລະ ບັນດາກົມ, ຫ້ອງການ, ສະຖາບັນ ແລະ ສູນ ຂອງກະຊວງພາຍໃນ ເຂົ້າຮ່ວມ.

ທ່ານ ຕ໋ອງ ພູມມີພັນ ຮອງປະທານຄະນະກວດກາພັກກະຊວງ ຫົວໜ້າກົມກວດກາ ກະຊວງພາຍໃນ ໄດ້ກ່າວວ່າ: ການຈັດກອງປະຊຸມໃນຄັ້ງນີ້ ກໍເພື່ອເຮັດໃຫ້ການຈັດຕັ້ງປະຕິບັດແຈ້ງການຂອງຫ້ອງການ ອົງການກວດກາລັດຖະບານ ສະບັບເລກທີ 842/ອກລ.ຫກ ໄດຮັບຜົນສໍາເລັດຕາມຄາດໝາຍ ແລະ ຮັບປະກັນໃຫ້ແກ່ການສະຫຼຸບກ່ຽວກັບການຈັດຕັ້ງປະຕິບັດຍຸດທະສາດຕ້ານການສໍ້ລາດບັງຫຼວງ ແຕ່ປີ 2013-2020 ຢູ່ກະຊວງພາຍໃນ ສໍາເລັດຜົນ ແລະ ວາງແຜນການເຄື່ອນໄຫວວຽກງານຂອງຄະນະກວດກາພັກກະຊວງ ໃຫ້ມີເນື້ອໃນຄົບຖ້ວນ ແລະ ຖືກຕ້ອງສອດຄ່ອງກັບການເຄື່ອນໄຫວວຽກງານຕົວຈິງ.

ໂອກາດນີ້ ທ່ານ ເທບພະໄທ ພັນກ້າ ຮອງຫົວໜ້າກົມກວດກາຕ້ານການສໍ້ລາດບັງຫຼວງ ອົງການກວດກາລັດຖະບານ ກໍໄດ້ແນະນໍາກ່ຽວກັບການຮ່າງບົດສະຫຼຸບການຈັດຕັ້ງປະຕິບັດແຜນຍຸດທະສາດຕ້ານການສໍ້ລາດບັງຫຼວງ ແຕ່ນີ້ຮອດປີ 2020 ໃຫ້ຄະນະຮັບຜິດຊອບກ່ຽວກັບວຽກງານກວດກາພັກ, ກວດກາລັດ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ໂດຍທ່ານໄດ້ຍົກໃຫ້ເຫັນການວາງຍຸດທະສາດ 05 ປະການໃນເນື້ອໃນຂອງການຈັດຕັ້ງປະຕິບັດ ເຊັ່ນ: ການສຶກສາອົບຮົມການເມືອງ-ແນວຄິດ ແລະ ສ້າງສະຕິກົດໝາຍ, ການຄົ້ນຄວ້າປັບປຸງ ແລະ ສ້າງນິຕິກໍາໃໝ່ ກ່ຽວກັບການສະກັດກັ້ນ ແລະ ຕ້ານການສໍ້ລາດບັງຫຼວງ, ປັບປຸງກົນໄກການຄຸ້ມຄອງລັດ, ປັບປຸງການຈັດຕັ້ງ ແລະ ພະນັກງານ ທີ່ເຮັດວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ ແລະ ການແກ້ໄຂການສໍ້ລາດບັງຫຼວງ.

Hits: 0

Leave a Reply

Your email address will not be published. Required fields are marked *