ກະຊວງພາຍໃນ

Ministry of Home Affairs

ໜ່ວຍພັກກົມພັດທະນາການບໍລິຫານລັດ ເລືອກຄະນະໜ່ວຍພັກຊຸດໃໝ່

ກອງປະຊຸມໃຫ່ຍ ຄັ້ງທີ II  ຂອງ ໜ່ວຍພັກກົມພັດທະນາການບໍລິຫານລັດ ກະຊວງພາຍໃນ ໄດ້ຈັດຂຶ້ນໃນວັນທີ 02 ພະຈິກ 2020 ນີ້  ໂດຍການເຂົ້າຮ່ວມ ຂອງ ສະຫາຍ ຄໍາມູນ ວິພົງໄຊ  ຮອງເລຂາຄະນະພັກກະຊວງ ຮອງລັດຖະມົນຕີກະຊວງພາຍໃນ, ມີເລຂາ, ຮອງເລຂາໜ່ວຍພັກ ຈາກຫ້ອງການ, ບັນດາກົມ, ສະຖາບັນ, ສູນ, ຕາງໜ້າ 3 ອົງການຈັດຕັ້ງມະຫາຊົນກະຊວງພາຍໃນ, ສະມາຊິກພັກສົມບູນ ແລະ ສຳຮອງຂອງໜ່ວຍ ເຂົ້າຮ່ວມ.

ກອງປະຊຸມຄັ້ງນີ້ ສະຫາຍ ນິສິດ ແກ້ວປັນຍາ ເລຂາໜ່ວຍພັກ ຫົວໜ້າກົມພັດທະນາການບໍລິຫານລັດ ໄດ້ຜ່ານບົດລາຍງານການເມືອງ ຂອງໜ່ວຍພັກໃນໄລຍະ 5 ປີຜ່ານມາ ເຊິ່ງຍົກໃຫ້ເຫັນຜົນສໍາເລັດໃນການເຄື່ອນໄຫວນໍາພາ-ຊີ້ນໍາວຽກງານໃນໄລຍະຜ່ານມາ ທີ່ໜ່ວຍພັກຈະຕ້ອງໄດ້ສືບຕໍ່ສົ່ງເສີມ ແລະ ດ້ານອ່ອນ, ຂໍ້ຄົງຄ້າງ ທີ່ຈະຕ້ອງໄດ້ພ້ອມກັນຄົ້ນຄວ້າແກ້ໄຂໃນໃຫ້ສໍາເລັດ ຊຶ່ງເນື້ອໃນທັງໝົດລ້ວນແຕ່ມີຄວາມໝາຍຄວາມສຳຄັນ ໃນການສືບຕໍ່ປັບປຸງຍົກບົດບາດການນຳພາສະມາຊິກພັກ, ພະນັກງານ-ລັດຖະກອນຂອງຄະນະໜ່ວຍ ໃຫ້ມີຄວາມເຂັ້ມແຂງ ແລະ ໜັກແໜ້ນທາງດ້ານການເມືອງງ-ແນວຄິດ ເພື່ອຮອງຮັບໃຫ້ແກ່ການເຕີບໃຫ່ຍຂະຫຍາຍຕົວຂອງໜ້າທີ່ວຽກງານໃນຕໍ່ໜ້າ.

       ນອກຈາກນັ້ນ, ກອງປະຊຸມ ຍັງໄດ້ຈັດປ່ອນບັດຄັດເລືອກເອົາຄະນະໜ່ວຍພັກກົມພັດທະນາການບໍລິຫານລັດ ຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ, ຖືກຕ້ອງ ແລະ ສອດຄ່ອງກັບມາດຖານ, ເງື່ອນໄຂ ທີ່ໄດ້ກຳນົດໄວ້ ໂດຍກອງປະຊຸມໄດ້ເຫັນດີເປັນເອກະພາບ ເລືອກເອົາ ສະຫາຍ ນິສິດ ແກ້ວປັນຍາ ເປັນ​ເລ​ຂາ​ໜ່ວຍ​ພັກ, ເລືອກເອົາ ສະຫາຍ ທອງສະຫວັນ ປັນຍາວິຈິດ ເປັນຮອງເລຂາໜ່ວຍພັກ ແລະ ເລືອກເອົາ ສະຫາຍ ແສງອາລຸນ ຍົດລືໄຊ ເປັນກຳມະການພັກ ທັງເປັນຜູ້ກວດກາໜ່ວຍພັກ.

ໃນຕອນທ້າຍກອງປະຊຸມ ສະຫາຍ ຄໍາມູນ ວິພົງໄຊ  ຮອງເລຂາຄະນະພັກກະຊວງ ຮອງລັດຖະມົນຕີກະຊວງພາຍໃນ ໄດ້ມີຄຳເຫັນໂອ້ລົມຕໍ່ກອງປະຊຸມ ໂດຍສະຫາຍໄດ້ ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດ ໃນການຊີ້ນຳ-ນຳພາ ຂອງຄະນະໜ່ວຍພັກຊຸດເກົ່າ ທີ່ໄດ້ຊີ້ນຳ-ນຳພາ ສະມາຊິກພັກ, ພະນັກງານ-ລັດຖະກອນ ເອົາໃຈໃສ່ປະຕິບັດໜ້າທີ່ການເມືອງຄຽງຄູ່ກັບວຽກງານວິຊາສະເພາະຂອງຕົນຢ່າງຫ້າວຫັນ ສາມາດຍາດໄດ້ຜົນສຳເລັດ​ຫຼາຍດ້ານ ພ້ອມນັ້ນ ຍັັງໄດ້ເນັ້ນ ໃຫ້ຄະນະໜ່ວຍພັກຊຸດໃໝ່ ຈົ່ງເອົາໃຈໃສ່ເພີ່ມທະວີວຽກງານສຶກສາອົບຮົມການເມືອງແນວຄິດໃຫ້ແກ່ສະມາຊິກພັກ, ພະນັກງານ-ລັດຖະກອນ ເຊື່ອມຊຶມ ແລະ ກຳແໜ້ນແນວທາງນະໂຍບາຍຂອງພັກລະບຽບກົດໝາຍຂອງລັດ ຢຶດໝັ້ນແບບແຜນນຳພາ ແລະ ວິທີເຮັດວຽກຕາມຫຼັກການລວມສູນປະຊາທິປະໄຕ ເອົາໃຈໃສ່ນຳພາ-ຊີ້ນຳ ການເຄື່ອນໄຫວວຽກງານວິຊາສະເພາະຕາມພາລະບົດບາດ ແລະ ສິດໜ້າທີ່ ທີ່ໄດ້ຮັບມອບໝາຍດ້ວຍຄວາມຮັບຜິດຊອບສູງ. ນອກນັ້ນ ສະຫາຍຍັງຮຽກຮ້ອງໃຫ້ ສະມາຊິກພັກທຸກສະຫາຍ ຕ້ອງໄດ້ສືບຕໍ່ສູ້ຊົນຈັດຕັ້ງປະຕິບັດໜ້າທີ່ການເມືອງຕິດພັນກັບວຽກງານວິຊາສະເພາະ ໂດຍສະເພາະແມ່ນວຽກງານການປັບປຸງກົງຈັກການຈັດຕັ້ງ, ວຽກງານການຄຸ້ມຄອງສະມາຄົມ ແລະ ມູນນິທິຕ່າງໆ ພ້ອມກັບການເຄື່ອນໄຫວວຽກງານຮອບດ້ານຂອງກົມ ໃຫ້ສຳເລັດຜົນຕາມຄາດໝາຍທີ່ວາງໄວ້ ເພື່ອໃຫ້ກາຍເປັນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ.

Hits: 0

Leave a Reply

Your email address will not be published. Required fields are marked *