ລັດຖະມົນຕີກະຊວງພາຍໃນ ຕ້ອນຮັບເອກອັກຄະລັດຖະທູດມົງໂກລີ ເຂົ້າຢ້ຽມອໍາລາ

ວັນທີ 2 ກັນຍາ 2021 ນີ້ ທ່ານ ປອ ທອງຈັນ ມະນີໄຊ ລັດຖະມົນຕີກະຊວງພາຍໃນ ໄດ້ຕ້ອນຮັບການເຂົ້າຢ້ຽມອໍາລາ ຂອງ ທ່ານ Lodoidamba GALBADRAHK ເອກອັກຄະລັດຖະທູດ ແຫ່ງ ສາທາລະນະລັດ ມົງໂກລີ ປະຈໍາ ລາວ ໃນໂອກາດທີ່ສໍາເລັດການປະຕິບັດໜ້າທີ່ການທູດ ຢູ່ ລາວ.

ໃນໂອກາດນີ້ ທ່ານ ປອ ທອງຈັນ ມະນີໄຊ ລັດຖະມົນຕີກະຊວງພາຍໃນ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຜົນສໍາເລັດໃນການປະຕິບັດໜ້າທີ່ການທູດຢູ່ ສປປ ລາວ ຂອງທ່ານ Lodoidamba GALBADRAHK ເຊິ່ງໃນຕະຫຼອດໄລຍະການປະຕິບັດໜ້າທີ່ການທູດ ນັບແຕ່ປີ 2015-2021 ທ່ານເອກອັກຄະລັດຖະທູດ ໄດ້ປະກອບສ່ວນຢ່າງຕັ້ງໜ້າໃນການເສີມຂະຫຍາຍສາຍພົວພັນມິດຕະພາບ ແລະ ໄດ້ຊຸກຍູ້ການຮ່ວມມືອັນດີງາມ ລະຫວ່າງສອງປະເທດ ລາວ-ມົງໂກລີ, ພ້ອມທັງໄດ້ອວຍພອນໃຫ້ທ່ານເອກອັກຄະລັດຖະທູດ ມີສຸຂະພາບແຂງແຮງ, ເດີນທາງກັບປະເທດດ້ວຍຄວາມສະຫວັດດີພາບ ແລະ ປະສົບຜົນສໍາເລັດໃນໜ້າທີ່ໃໝ່.

ທ່ານ Lodoidamba GALBADRAHK ໄດ້ສະແດງຄວາມຂອບໃຈຕໍ່ທ່ານລັດຖະມົນຕີກະຊວງພາຍໃນ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ຂອບໃຈມາຍັງ ພັກ-ລັດຖະບານ ແລະ ປະຊາຊົນລາວ ທີ່ໄດ້ໃຫ້ການຮ່ວມມືເປັນຢ່າງດີ ພ້ອມທັງອໍານວຍຄວາມສະດວກໃຫ້ແກ່ການເຄື່ອນໄຫວປະຕິບັດໜ້າທີ່ການທູດຂອງຕົນມີຜົນສໍາເລັດ ໃນໄລຍະດໍາລົງຕໍາແໜ່ງເປັນເອກອັກຄະລັດຖະທູດ ແຫ່ງ ສາທາລະນະລັດ ມົງໂກລີ ປະຈໍາ ລາວ.

Leave a Reply

Your email address will not be published. Required fields are marked *