ກົມການປົກຄອງທ້ອງຖິ່ນ ກະຊວງພາຍໃນ ກຳນົດພະນັກງານນຳພາ-ຄຸ້ມຄອງ ຮອບທີ I

ໃນວັນທີ 14 ກັນຍາ 2021 ກົມການປົກຄອງທ້ອງຖິ່ນ ກະຊວງພາຍໃນ ໄດ້ຈັດກອງ​ປະຊຸມສ້າງແຜນການກຳນົດພະນັກງານນຳພາ-ຄຸ້ມຄອງ ຮອບທີ I  ໂດຍການເປັນປະທານຂອງ ທ່ານ ນິສິດ ແກ້ວປັນຍາ ຮອງລັດຖະມົນຕີກະຊວງພາຍໃນ ເຂົ້າຮ່ວມມີ ຫົວໜ້າກົມການປົກຄອງທ້ອງຖິ່ນ, ຫົວໜ້າກົມຈັດຕັ້ງ ແລະ ພະນັກງານ, ຄະນະກົມການປົກຄອງທ້ອງຖິ່ນ ແລະ ພະນັກງານ-ລັດຖະກອນ ເຂົ້າຮ່ວມ.

ກອງປະຊຸມຄັ້ງນີ້, ທ່ານ ທ່ານ ນິສິດ ແກ້ວປັນຍາ ຮອງລັດຖະມົນຕີກະຊວງພາຍໃນ ໃຫ້ກຽດຂຶ້ນເຜີຍແຜ່ມະຕິຂອງກົມການເມືອງສູນກາງພັກວ່າດ້ວຍວຽກງານສ້າງແຜນການກຳນົດພະນັກງານນຳພາ-ຄຸ້ມຄອງ ສະບັບເລກທີ 032/ກມສພ, ລົງວັນທີ 03 ມັງກອນ 2018 ເຊິ່ງມະຕິດັ່ງກ່າວ ປະກອບດ້ວຍ 3 ພາກ ຄື: ຂໍ້ບັນຍັດລວມ, ເນື້ອໃນການສ້າງແຜນກຳນົດພະນັກງານ,ການຈັດຕັ້ງປະຕິບັດ   ແລະ ມີທັງໝົດ 13 ມາດຕາ, ເຊິ່ງເນື້ອໃນບາງຕອນສໍາຄັນທ່ານໄດ້ກ່າວວ່າ: ການສ້າງແຜນກຳນົດພະນັກງານ ເປັນວຽກໜຶ່ງທີ່ສຳຄັນພື້ນຖານຂອງວຽກງານພະນັກງານ, ຮັບປະກັນຫັນວຽກງານພະນັກງານດຳເນີນຕາມລະບຽບແບບແຜນ ເພື່ອຕອບສະໜອງໜ້າທີ່ການເມືອງ ຂອງພັກ-ລັດ ໃນສະເພາະໜ້າ ແລະ ຍາວນານ, ເປັນການຫັນຍຸດທະສາດກ່ຽວກັບວຽກງານພະນັກງານເປັນອັນລະອຽດ , ສ້າງໂຄງການສັງລວມພື້ນຖານ ໃຫ້ແກ່ການສ້າງແຜນກໍ່ສ້າງ-ບຳລຸງ, ຄາດຄະເນສັບຊ້ອນ ແລະ ຈັດວາງພະນັກງານຢ່າງສົມເຫດສົມຜົນ. ຈາກນັ້ນ ທ່ານ ບຸນຍົງ ສີສຸພັນ ຫົວໜ້າກົມຈັດຕັ້ງ ແລະ ພະນັກງານ ກະຊວງພາຍໃນ  ໄດ້ຂຶ້ນຜ່ານມະຕິຂອງກົມການເມືອງສູນກາງພັກວ່າດ້ວຍມາດຕະຖານຂອງພະນັກງານນຳພາ-ຄຸ້ມຄອງ ສະບັບເລກທີ 030/ກມສພ, ລົງວັນທີ 03 ມັງກອນ 2018 ແລະ ແນະນໍາວິທີລົງຄະແນນທາບທາມ.

ນອກນັ້ນ ໃນຕອນທ້າຍກອງປະຊຸມ ຍັງໄດ້ມີການລົງຄະແນນປ່ອນບັດທາບທາມແຜນກຳນົດພະນັກງານ-ຄຸ້ມຄອງຮອບ 1 ເທື່ອທີ  1 ຂອງ ກົມການປົກຄອງທ້ອງຖິ່ນ ອີກດ້ວຍ.

Leave a Reply

Your email address will not be published. Required fields are marked *