ກະຊວງພາຍໃນ ໄດ້ຮັບອຸປະກອນວັດແທກອຸນຫະພຸມ ແລະ ອຸປະກອນປ້ອງກັນການແຜ່ລະບາດຂອງເຊື້ອພະຍາດ ໂຄວິດ-19

ໃນວັນທີ 08 ຕຸລາ 2021 ນີ້, ບໍລິສັດໄຊຍະສິດ ທີ່ປືກສາໄອທີ ຈໍາກັດຜູ້ດຽວ ໄດ້ນໍາເອົາອຸປະກອນວັດແທກອຸນຫະພຸມ ແລະ ອຸປະກອນປ້ອງກັນການແຜ່ລະບາດຂອງເຊື້ອພະຍາດ ໂຄວິດ-19 ມາມອບໃຫ້ ກະຊວງພາຍໃນ ໂດຍການເຂົ້າຮ່ວມພິທີມອບ-ຮັບອຸປະກອນດັ່ງກ່າວ ຂອງ ທ່ານ ປອ ທອງຈັນ ມະນີໄຊ ລັດຖະມົນຕີກະຊວງພາຍໃນ, ທ່ານ ພຸດທະວົງ ໄຊຍະສິດ ຕາງໜ້າໃຫ້ບໍລິສັດໄຊຍະສິດ ທີ່ປືກສາໄອທີ ແລະ ທ່ານ Mathieu Ploton ຕາງໜ້າບໍລິສັດ DERMALOG ປະເທດເຢຍລະມັນ ເຊິ່ງເປັນບໍລິສັດຄູ່ຄ້າຮ່ວມກັບບໍລິສັດໄຊຍະສິດ ທີ່ປືກສາໄອທີ ພ້ອມນັ້ນຍັງມີຫົວໜ້າຫ້ອງການ ແລະ ຕາງໜ້າກົມກ່ຽວຂ້ອງຂອງກະຊວງພາຍໃນ  ເຂົ້າຮ່ວມ.

          ເຄື່ອງທີ່ນໍາມາມອບຄັ້ງນີ້ ປະກອບມີ ເຄື່ອງວັດແທກອຸນຫະພູມ 10 ເຄື່ອງ, ນ້ຳເຫຼົ້າ 100 ຂວດ ແລະ ໜ້າກາກອານາໄມ 200 ກັບ ລວມມູນຄ່າທັງໝົດ  25,000,000 ກີບ.

ອຸປະກອນຈໍານວນດັ່ງກ່າວ ກະຊວງພາຍໃນ ຈະນໍາໃຊ້ເຂົ້າໃນວຽກງານສະກັດກັ້ນ ແລະ ຕ້ານການແຜ່ລະບາດຂອງພະຍາດໂຄວິດ-19 ໃນໝູ່ພະນັກງານ-ລັດຖະກອນ ເພື່ອເພີ່ມປະສິດທິພາບໃນການປະຕິບັດໜ້າທີ່ວຽກງານໃນໄລຍະທີ່ມີການແຜ່ລະບາດຂອງພະຍາດໂຄວິດ ໃຫ້ມີຜົນສໍາເລັດ ແລະ ໃຫ້ເກີດປະໂຫຍດສູງສຸດຈາກການນໍາໃຊ້ອຸປະກອນດັ່ງກ່າວ.

ບໍລິສັດໄຊຍະສິດ ທີ່ປືກສາໄອທີ ແມ່ນບໍລິສັດໄອທີຂອງຄົນລາວ ທີ່ໃຫ້ບໍລິການດ້ານການພັດທະນາລະບົບໂປຣແກຣມຄອມພິວເຕີ, ລະບົບຖານຂໍ້ມູນ, ລະບົບເຄືອອຂ່າຍ ແລະ ຄວາມປອດໄພຂອງຄອມພິວເຕີ ໃຫ້ກັບພາກລັດ ແລະ ເອກະຊົນ ໃນ ສປປ ລາວ.

Leave a Reply

Your email address will not be published. Required fields are marked *