ກອງປະຊຸມພົບປະຊຸມພົບປະສອງຝ່າຍ ລະຫວ່າງ ກະຊວງພາຍໃນ ແຫ່ງ ສປປ ລາວ ແລະ ກໍາປູເຈຍ ກະຊວງທໍາມະການ ແລະ ສາສະໜາ ແຫ່ງຣາຊະອານາຈັກກໍາປູເຈຍ

ໃນໂອກາດທີ່ ທ່ານ ນ. ລີວົງ ລາວລີ ຮອງລັດຖະມົນຕີກະຊວງພາຍໃນ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ແລະ ຮ່ວມເຮັດວຽກ ຢູ່ຣາຊະອານາຈັກກໍາປູເຈຍ, ວັນທີ 26 ພະຈິກ 2024 ນີ້ ທ່ານ ນ. ລີວົງ ລາວລີ ຮອງລັດຖະມົນຕີກະຊວງພາຍໃນ ພ້ອມດ້ວຍຄະນະ ໄດ້ຮ່ວມເຮັດວຽກກັບ ທ່ານ ໃຈ ໂບລິນ (CHAI BORIN) ລັດຖະມົນຕີກະຊວງທໍາມະການ ແລະ ສາສະໜາ ພ້ອມດ້ວຍຄະນະຜູ້ແທນ ແຫ່ງຣາຊະອານາຈັກກໍາປູເຈຍ.

ໃນກອງປະຊຸມພົບປະສອງຝ່າຍ ທ່ານ ນ. ລີວົງ ລາວລີ ຮອງລັດຖະມົນຕີກະຊວງພາຍໃນ ໄດ້ກ່າວວ່າ: ການມາຢ້ຽມຢາມພົບປະ ແລະ ເຮັດວຽກຂອງຄະນະຜູ້ແທນ ໃນຄັ້ງນີ້ ເປັນການປະກອບສ່ວນອັນສຳຄັນ ເຂົ້າໃນການເສີມຂະຫຍາຍສາຍພົວພັນມິດຕິພາບ ທີ່ເປັນມູນເຊື້ອ ແລະ ການພົວພັນຄູ່ຮ່ວມມືຍຸດທະສາດຮອບດ້ານ ແລະ ຍາວນານ ລະຫວ່າງ ສອງລັດ ປະຊາຊົນສອງຊາດ ເວົ້າລວມ, ເວົ້າສະເພາະ ການປະຊຸມຄັ້ງນີ້ ຍັງໄດ້ປຶກສາຫາລືເປັນເອກະພາບກັນຕໍ່ກັບເນື້ອໃນບົດບັນທຶກຮ່ວມມື ໄລຍະປີ 2025-2029 ແລະ ແລກປ່ຽນບົດຮຽນໃນການຈັດຕັ້ງປະຕິບັດວຽກງານສາສະໜາ ຢູ່ ສປປ ລາວ ແລະ ຣາຊະອານາຈັກກໍາປູເຈຍ ເພື່ອຈັດຕັ້ງປະຕິບັດວຽກງານສາສະໜາໃຫ້ເຂົ້າສູ່ລວງເລິກ, ນັບມື້ແໜ້ນແຟ້ນ, ເຕີບໃຫຍ່ ແລະ ພັດທະນາຍິ່ງໆຂຶ້ນ.

ທ່ານຍັງກ່າວອີກວ່າ ວຽກງານສາສະໜາ ແມ່ນວຽກງານໜຶ່ງ ທີ່ ພັກ- ລັດຖະບານ ຖືເປັນ ບັນຫາສໍາຄັນ ເພາະເປັນວຽກງານທາງດ້ານຈິດຕະສາດ ທີ່ລະອຽດອ່ອນ, ການເຊື່ອຖືສາສະໜາ ຫຼື ຄວາມເຊື່ອໃດໜຶ່ງ ນັ້ນ ແມ່ນຄວາມຮຽກຮ້ອງຕ້ອງການ ທາງດ້ານຈິດໃຈ ຂອງປະຊາຊົນລາວບັນດາເຜົ່າ ທີ່ມີມາເປັນເວລາດົນນານ ຈົນຮອດປັດຈຸບັນ ແລະ ຍັງຄົງສືບຕໍ່ໃນອະນາຄົດ. ເພື່ອຮັບປະກັນ ການຈັດຕັ້ງປະຕິບັດ ສິດ ໃນການເຊື່ອຖື ຫຼື ບໍ່ເຊື່ອຖື ສາສະໜາ ຂອງພົນລະເມືອງລາວ ໄດ້ຮັບການຈັດຕັ້ງປະຕິບັດຢ່າງເຕັມສ່ວນນັ້ນ, ພັກ-ລັດຖະບານ ໄດ້ເອົາໃຈໃສ່ ໃນການວາງນະໂຍບາຍ, ກົດໝາຍ ແລະລະບຽບການ ຫຼື ນິຕິກໍາ ເພື່ອເປັນຫຼັກການໃນການຈັດຕັ້ງປະຕິບັດ ເຊິ່ງປັດຈຸບັນ ສປປ ລາວ ປະກອບດ້ວຍ 50 ຊົນເຜົ່າ ແລະ ມີ 4 ສາສະໜາ ທີ່ເຄື່ອນໄຫວ ຢູ່ ສປປ ລາວ.