ອາຊຽນ ສ້າງຄວາມອາດສາມາດ ໃຫ້ຜູ້ບໍລິຫານລະດັບກາງຂອງບັນດາປະເທດສະມາຊິກ
ເພື່ອປະຕິບັດຕາມແຜນງານຮ່ວມມືວຽກງານລັດຖະກອນອາຊຽນ ປະຈໍາປີ 2021-2025 ກະຊວງລັດຖະກອນ ແຫ່ງລາຊະອານາຈັກກໍາປູເຈຍ ໄດ້ເປັນເຈົ້າພາບຈັດກອງປະຊຸມ ໃນຫົວຂໍ້: ການສ້າງຄວາມອາດສາມາດໃນການຫັນປ່ຽນການນຳພາໃຫ້ກັບຜູ້ບໍລິຫານລະດັບກາງຂອງບັນດາປະເທດສະມາຊິກອາຊຽນ ແລະ ປະເທດຕີມໍ-ເລສເຕ (Capacity Building on Transformative Leadership for Middle Level Official of AMS Countries and Timor-Leste) ຂຶ້ນ ລະຫວ່າງ ວັນທີ 21-25 ສິງຫາ 2023 ທີ່ນະຄອນສຽມລຽບ ປະເທດກຳປູເຈຍ. ຕາງໜ້າກະຊວງພາຍໃນ ສປປ ລາວ ເຂົ້າຮ່ວມກອງປະຊຸມມີ ທ່ານ ນັນທະພົນ ລີວັດທະນາ ຫົວໜ້າພະແນກວາງແຜນ ແລະ ຮ່ວມມືວຽກງານລັດຖະກອນ ແລະ ທ່ານ ສີສຸພັນ ໄຊຍະລາດ ຜູ້ປະສານງານວຽກງານລັດຖະກອນອາຊຽນ ກົມຄຸ້ມຄອງລັດຖະກອນ ກະຊວງພາຍໃນ ສປປ ລາວ.
![](https://moha.gov.la/wp-content/uploads/2023/09/371354155_737448061726458_1696175761224566041_n-1024x682.jpg)
ກອງປະຊຸມຄັ້ງນີ້ ເປັນເວທີນໍາສະເໜີບົດຮຽນ ແລະ ແລກປ່ຽນປະສົບການ ຕໍ່ກັບວິທີການນໍາພາພາຍໃນອົງກອນ, ຂົງເຂດວຽກງານຄຸ້ມຄອງລັດຖະກອນ, ການສື່ສານພາຍໃນອົງກອນທີ່ມີປະສິດທິດພາບ, ການນໍາໃຊ້ສິ່ງປະດິດສ້າງ ແລະ ເຕັກໂນໂລຊີໃໝ່ເຂົ້າໃນວຽກງານຄຸ້ມຄອງລັດຖະກອນ ຂອງຜູ້ບໍລິຫານລະດັບກາງ ຈາກປະເທດສະມາຊິກອາຊຽນ ແລະ ປະເທດຕີມໍ-ເລດສະເຕ.
ໃນກອງປະຊຸມ ຕາງໜ້າຈາກ ສປປ ລາວ ໄດ້ນໍາສະເໜີກ່ຽວກັບບັນດານະໂຍບາຍ ແລະ ນິຕິກໍາຕ່າງໆ ຂອງ ສປປ ລາວ ຕໍ່ກັບວຽກງານດັ່ງກ່າວ ແລະ ຕາງໜ້າບັນດາປະເທດສະມາຊິກອາຊຽນ ແລະ ປະເທດຕີມໍ-ເລດສະເຕ ກໍ່ໄດ້ຜັດປ່ຽນກັນຂຶ້ນນຳສະເໜີບົດທີ່ຕິດພັນກັບວຽກງານຂອງຕົນ. ສໍາລັບ ຊ່ຽວຊານຈາກ ສປ ຈີນ, ຍີ່ປຸ່ນ ແລະ ສ ເກົາຫລີ ມາຮ່ວມເປັນວິທະຍາກອນ ແລະ ເປັນຜູ້ນໍາພາການສົນທະນາໃນຫົວຂໍ້ຕ່າງໆ. ນອກນັ້ນ ຜູ້ແທນທີ່ເຂົ້າຮ່ວມຈາກປະເທດສະມາຊິກອາຊຽນ, ຕີມໍ-ເລດສະເຕ, ປະເທດບວກ3, ຜູ້ແທນຈາກບັນດາກະຊວງ, ອົງການ ແລະ ອົງການປົກຄອງທ້ອງຖິ່ນຂອງປະເທດກໍາປູເຈຍ ຍັງໄດ້ສົນທະນາແລກປ່ຽນຄໍາເຫັນ ມີປະໂຫຍດສູງ ເພື່ອເປັນແນວທາງຕໍ່ການຈັດຕັ້ງປະຕິບັດແຜນການຮ່ວມມືວຽກງານລັດຖະກອນອາຊຽນ (2021-2025) ໃຫ້ໄດ້ຮັບຜົນສໍາເລັດຕາມລະດັບຄາດໝາຍ.