ຮອງລັດຖະມົນຕີກະຊວງພາຍໃນ ເຂົ້າຮ່ວມກອງປະຊຸມໂຕະມົນຊຸມຊົນຊາວພຸດທະສາສະໜາ ທີ່ປະເທດເນປານ

ເພື່ອສົ່ງເສີມການແລກປ່ຽນທາງດ້ານວັດທະນາທໍາ ແລະ ຮັດແໜ້ນສາຍພົວພັນລະຫວ່າງບັນດາຊຸມຊົນຊາວພຸດທະສາສະໜາ ໃນຂົງເຂດທະເລຈີນໃຕ້, ໃນລະຫວ່າງວັນທີ 12-15 ທັນວາ 2024 ນີ້ ທ່ານ ນ. ລີວົງ ລາວລີ ຮອງລັດຖະມົນຕີກະຊວງພາຍໃນ ພ້ອມດ້ວຍຫົວໜ້າ-ຮອງຫົວໜ້າ ຫ້ອງການ ກະຊວງພາຍໃນ, ກົມຊົນເຜົ່າ ແລະ ສາສະໜາ, ຕາງໜ້າຈາກສູນກາງແນວລາວສ້າງຊາດ, ອົງການພຸດທະສາສະໜາສໍາພັນລາວ, ສະພາແຫ່ງຊາດ ແລະ ວິຊາການ ທີ່ກ່ຽວຂ້ອງ ໄດ້ເຂົ້າຮ່ວມກອງປະຊຸມໂຕະມົນຊຸມຊົນຊາວພຸດທະສາສະໜາ ທີ່ປະເທດເນປານ.

ກອງປະຊຸມໂຕະມົນຊຸມຊົນຊາວພຸດທະສາສະໜາ ໄດ້ລິເລີ່ມມາແຕ່ປີ 2016 ແລະ ຄັ້ງນີ້ເປັນຄັ້ງທີ 09 ໂດຍມີບັນດາພະນັກງານຈາກພາກລັດ, ນັກບວດ ແລະ ນັກຄົ້ນຄວ້າ ຈາກຫຼາຍກວ່າ 20 ປະເທດທົ່ວໂລກ ລວມທັງບັນດາປະເທດໃນຂົງເຂດທະເລຈີນໃຕ້ເຂົ້າຮ່ວມ ເຊິ່ງກອງປະຊຸມດັ່ງກ່າວໄດ້ຈັດຂຶ້ນພາຍໃຕ້ຫົວຂໍ້ ສັນຕິພາບ, ການຮ່ວມມື ແລະ ການຊ່ວຍເຫຼືອເຊິ່ງກັນ ແລະ ກັນ ໂດນເນື້ອໃນກອງປະຊຸມເປັນການສົນທະນາແລກປ່ຽນ ແລະ ສ້າງຄວາມເປັນເອກະພາບຮ່ວມກັນ ເພື່ອການຮ່ວມມືກັນໃນຕໍ່ໜ້າ.

ກະຊວງພາຍໃນ ໃນໂອກາດເຂົ້າຮ່ວມກອງປະຊຸມໃນຄັ້ງນີ້ ເປັນໂອກາດດີໃນການຊຸກຍູ້, ລະດົມຂົນຂວາຍການສະໜັບສະໜູນທາງດ້ານທຶນຮອນ ແລະ ການສົ່ງເສີມການຮ່ວມມືໃນວຽກງານສາສະໜາກັບບັນດາປະເທດອື່ນໆ ໂດຍສະເພາະແມ່ນບັນດາປະເທດໃນຂົງເຂດທະເລຈີນໃຕ້. ນອກຈາກນີ້ ຍັງເປັນການສົ່ງເສີມສັນຕິພາບ, ການຮ່ວມມື ແລະ ການພັດທະນາໃນຂົງເຂດວຽກງານສາສະໜາອີກດ້ວຍ.