ກະຊວງການຕ່າງປະເທດ ຈາກປະເທດອິນເດຍ ຮ່ວມເຮັດວຽກກັບ ກະຊວງພາຍໃນ ແຫ່ງ ສປປ ລາວ

ໃນລະຫວ່າງວັນທີ 4-5 ທັນວາ 2024 ນີ້ ທ່ານ ນາງ ສະວາຕີ ອາຣະຢາ (Shaswati Arya) ຮອງຫົວໜ້າກົມ ກະຊວງການຕ່າງປະເທດ ຂອງປະເທດອິນເດຍ ພ້ອມດ້ວຍຄະນະ ໄດ້ຮ່ວມເຮັດວຽກກັບ ກະຊວງພາຍໃນ ແຫ່ງ ສປປ ລາວ ໂດຍການຕ້ອນຮັບຂອງທ່ານ ວັນນະ ບຸບຜາ ຫົວໜ້າຫ້ອງການ ກະຊວງພາຍໃນ.

ການເດີນທາງມາຮ່ວມເຮັດວຽກກັບກະຊວງພາຍໃນ ແຫ່ງ ສປປ ລາວ ໃນຄັ້ງນີ້ ເພື່ອປຶກສາຫາລື ແລະ ເກັບກໍາ-ສັງລວມຂໍ້ມູນກ່ຽວກັບການພັດທະນາໂຄງລ່າງພື້ນຖານທາງດ້ານເຕັກໂນໂລຊີ ແລະ ຂໍ້ມູນຂ່າວສານ ຂອງກະຊວງພາຍໃນ ສປປ ລາວ ເພື່ອ ເພື່ອນໍາໄປຄົ້ນຄວ້າ ແລະ ໃຫ້ການສະໜັບສະໜູນການພັດທະນາ ວຽກງານຖານຂໍ້ມູນ ຂອງກະຊວງພາຍໃນ ສປປ ລາວ ໃນຕໍ່ໜ້າ.

ໃນໄລຍະຜ່ານມາ ຫ້ອງການກະຊວງພາຍໃນ ໄດ້ຜັນຂະຫຍາຍຜົນສຳເລັດ ຂອງການພົບປະລະຫວ່າງທ່ານລັດຖະມົນຕີກະຊວງພາຍໃນ ຮ່ວມກັບ ທ່ານເອກອັກຄະລັດຖະທູດແຫ່ງປະເທດອິນເດຍ ປະຈຳ ສປປ ລາວ ໃນຄັ້ງວັນທີ 18 ກໍລະກົດ 2024 ທີ່ ກະຊວງພາຍໃນ ແລະ ທາງສະຖານເອກອັກຄະລັດຖະທູດ ປະເທດອິນເດຍ ປະຈຳ ສປປ ລາວ ໄດ້ຊ່ວຍປະສານ ແລະ ຈັດກອງປະຊຸມທາງໄກ ຮ່ວມກັບກະຊວງເຕັກໂນໂລຊີ ແລະ ຂໍ້ມູນຂ່າວສານ ແລະ ກະຊວງທີ່ກ່ຽວຂ້ອງ ຂອງປະເທດອິນເດຍ ໂດຍສະເພາະແມ່ນກະຊວງເອເລັກໂຕຣນິກ ແລະ ເຕັກໂນໂລຊີຂໍ້ມູນຂ່າວສານ ຂອງປະເທດອິນເດຍ ໃນປຶກສາຫາລື ແລະ ຄົ້ນຄວ້າການສະໜັບສະໜູນທາງດ້ານເຕັກນິກ ວິຊາການ ແລະ ການກະກຽມການຫັນເປັນທັນສະໄໝ ຂອງກະຊວງພາຍໃນ ຕາມແຜນການຫັນເປັນດິຈິຕອນ ຂອງກະຊວງພາຍໃນ ໄລຍະປີ 2025-2026 ແລະ ທິດທາງຮອດປີ 2030.