ກອງປະຊຸມປຶກສາຫາລືກ່ຽວກັບນິຕິກໍາ ເພື່ອຮອງຮັບການທົດລອງສ້າງຕາແສງ

ວັນທີ 16 ທັນວາ 2024 ກົມການປົກຄອງທ້ອງຖິ່ນ ກະຊວງພາຍໃນ ໄດ້ຈັດກອງປະຊຸມປຶກສາຫາລືກ່ຽວກັບນິຕິກໍາ ເພື່ອຮອງຮັບການທົດລອງສ້າງຕາແສງຂຶ້ນ ໂດຍການເປັນປະທານຂອງທ່ານ ປອ ວິໄລວົງ ບຸດດາຄໍາ ລັດຖະມົນຕີກະຊວງພາຍໃນ, ມີຮອງລັດຖະມົນຕີ ບັນດາກະຊວງອ້ອມຂາງ, ຮອງຫົວໜ້າອົງການຂັ້ນສູນກາງ, ຫົວໜ້າ-ຮອງຫົວໜ້າກົມ, ຮອງເຈົ້າເມືອງ ແລະ ຕາງໜ້າຈາກນະຄອນຫຼວງວຽງຈັນເຂົ້າຮ່ວມ.

ທ່ານ ປອ ວິໄລວົງ ບຸດດາຄໍາ ລັດຖະມົນຕີກະຊວງພາຍໃນ ໄດ້ກ່າວວ່າ ການຈັດກອງປະຊຸມຄັ້ງນີ້ເພື່ອໃຫ້ຜູ້ເຂົ້າຮ່ວມ ໄດ້ຄົ້ນຄວ້າ ແລະ ປະກອບຄຳເຫັນໃສ່ຮ່າງຂໍ້ຕົກລົງທັງ 3 ສະບັບ. ພ້ອມທັງໄດ້ເນັ້ນໃຫ້ຄົ້ນຄວ້າກັນຢ່າງລະອຽດ ນັບແຕ່ຊື່ ຂອງນິຕິກຳ ຊຶ່ງເປັນຂໍ້ຕົກລົງ ຂອງນາຍົກລັດຖະມົນຕີ ວ່າເໝາະແລ້ວບໍ່ ຫຼື ເປັນດຳລັດ ຂອງນາຍົກລັດຖະມົນຕີ ຫຼື ແນວໃດ ລວມທັງໂຄງສ້າງ ຂອງຂໍ້ຕົກລົງ ແລະ ເນື້ອໃນຕ່າງໆ ໃນແຕ່ລະມາດຕາ, ໂດຍສະເພາະແມ່ນ: ໜ້າທີ່, ກົງຈັກ, ບຸກຄະລາກອນ ແລະ ອື່ນໆ. ນອກຈາກນີ້ ຍັງຮຽກຮ້ອງມາຍັງຜູ້ເຂົ້າຮ່ວມ ໃຫ້ປະກອບຄຳເຫັນຢ່າງເລິກເຊິ່ງ, ກົງໄປກົງມາ, ກະທັດຮັດ, ມີຈຸດສຸມ ແລະ ສາມາດຈັດຕັ້ງປະຕິບັດໄດ້ ເພື່ອໃຫ້ກະຊວງພາຍໃນ ກໍ່ຄືກອງເລຂານຳໄປຄົ້ນຄວ້າ ປັບປຸງໃຫ້ຄົບຖ້ວນ ສົມບູນຍິ່ງຂຶ້ນ.

ຈາກນັ້ນທ່ານ ບຸນຈັນ ນິຍະວົງ ຫົວໜ້າກົມການປົກຄອງທ້ອງຖິ່ນ ໄດ້ຜ່ານຮ່າງຂໍ້ຕົກລົງ ຂອງນາຍົກລັດຖະມົນຕີ ວ່າດ້ວຍ ການຈັດຕັ້ງ ແລະ ການເຄື່ອນໄຫວ ຂອງອົງການປົກຄອງຕາແສງ ແລະ ຮ່າງຂໍ້ຕົກລົງ ຂອງນາຍົກລັດຖະມົນຕີ ວ່າດ້ວຍ ການສ້າງຕັ້ງຕາແສງທົດລອງ ເຊິ່ງຂໍ້ຕົກລົງດັ່ງກ່າວ ຈະເປັນບ່ອນອີງໃຫ້ແກ່ການຈັດຕັ້ງ ແລະ ການເຄື່ອນໄຫວ ຂອງຕາແສງໃນຂອບເຂດທົ່ວປະເທດ, ເນື້ອໃນຂໍ້ຕົກລົງດັ່ງກ່າວ ໄດ້ກໍານົດກ່ຽວກັບທີ່ຕັ້ງ, ພາລະບົດບາດ, ການສ້າງຕັ້ງ, ໜ້າທີ່, ສິດ, ໂຄງປະກອບການຈັດຕັ້ງ, ການເງິນ, ລະບອບວິທີເຮັດວຽກ ແລະ ກອງປະຊຸມ ຂອງອົງການປົກຄອງຕາແສງ. ພ້ອມກັນນັ້ນ, ກໍເປັນບ່ອນອີງໃຫ້ແກ່ກະຊວງ ແລະ ອົງການກ່ຽວຂ້ອງຂັ້ນສູນກາງ ຄົ້ນຄວ້າ, ກຳນົດໜ້າວຽກລະອຽດ ຂອງຂະແໜງການຕົນມອບໃຫ້ຕາແສງຮັບຜິດຊອບ. ໃນນັ້ນ ໄດ້ກຳນົດເອົາ 04 ຈຸດ ເພື່ອເຮັດທົດລອງສ້າງຕັ້ງຕາແສງ ຄື: ກຸ່ມນາໂງມ-ນາຕານ ເມືອງໄຊທານີ ນະຄອນຫຼວງວຽງຈັນ, ກຸ່ມຈຽງຕູບ ເມືອງເຊໂປນ ແຂວງສະຫວັນນະເຂດ, ກຸ່ມລາວຮຸ່ງ-ພຽງສາ ເມືອງຊຽງຄໍ້ ແຂວງຫົວພັນ ແລະ ກຸ່ມຄັງວຽງ ເມືອງໝອກ ແຂວງຊຽງຂວາງ.

ນອກຈາກນີ້ຜູ້ເຂົ້າຮ່ວມຍັງໄດ້ຮັບຟັງການຜ່ານຮ່າງ ຂໍ້ຕົກລົງ ຂອງເຈົ້າຄອງນະຄອນຫຼວງວຽງຈັນ ວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງຕາແສງ ຢູ່ນະຄອນຫຼວງວຽງຈັນ ເຊິ່ງເປັນການຜັນຂະຫຍາຍ ຂໍ້ຕົກລົງ ຂອງນາຍົກລັດຖະມົນຕີ ເປັນອັນລະອຽດ ພ້ອມທັງເປັນຕົວຢ່າງໃຫ້ກັບແຂວງອື່ນໆ ຈາກທ່ານ ນ. ດໍາດວນ ຈັນທະວົງ ຮອງເຈົ້າເມືອງເມືອງໄຊທານີ ນະຄອນຫຼວງວຽງຈັນ ອີກດ້ວຍ.