ກອງປະຊຸມຜັນຂະຫຍາຍເນື້ອໃນກອງປະຊຸມສະຫຼຸບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ທົ່ວປະເທດ ປະຈໍາປີ 2022 ແລະ ປະກາດການຈັດຕັ້ງ ກະຊວງພາຍໃນ

ວັນທີ 1 ມີນາ 2023 ນີ້ ກະຊວງພາຍໃນ ໄດ້ຈັດພິທີເຊື່ອມຊຶມການຈັດຕັ້ງຜັນຂະຫຍາຍເນື້ອໃນກອງປະຊຸມສະຫຼຸບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ທົ່ວປະເທດ ປະຈໍາປີ 2022 ຂຶ້ນ, ໂດຍການເປັນປະທານຂອງທ່ານ ປອ ທອງຈັນ ມະນີໄຊ ກໍາມະການສູນກາງພັກ ເລຂາພັກກະຊວງ ລັດຖະມົນຕີກະຊວງພາຍໃນ, ມີຄະນະປະຈໍາພັກ, ຄະນະພັກກະຊວງ, ຜູ້ຕາງໜ້າຈາກຄະນະຈັດຕັ້ງສູນກາງພັກ, ຄະນະໜ່ວຍພັກ, ສະມາຊິກພັກ ແລະ ພະນັກງານ-ລັດຖະກອນ ທີ່ສັງກັດຢູ່ຫ້ອງການ, ບັນດາກົມ, ສະຖາບັນ ແລະ ສູນ ເຂົ້າຮ່ວມ.

ທ່ານ ປອ ທອງຈັນ ມະນີໄຊ ກໍາມະການສູນກາງພັກ ເລຂາພັກກະຊວງ ລັດຖະມົນຕີກະຊວງພາຍໃນ ໄດ້ກ່າວເປີດກອງປະຊຸມ ໂດຍທ່ານ ໄດ້ຍົກໃຫ້ເຫັນບາງຕອນວ່າ: ກອງປະຊຸມຜັນຂະຫຍາຍເນື້ອໃນສະຫຼຸບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ທົ່ວປະເທດ ປະຈໍາປີ 2022 ແລະ ປະກາດການຈັດຕັ້ງ ຄັ້ງນີ້ ເປັນກອງປະຊຸມທີ່ມີຄວາມໝາຍຄວາມສຳຄັນ ເພາະເປັນກອງປະຊຸມຄົ້ນຄ້ວາເຊື່ອມຊືມ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI ແລະ ມະຕິກອງປະຊຸມ ຄັ້ງທີ II ຂອງອົງຄະນະພັກກະຊວງພາຍໃນ ກ່ຽວກັບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ໃຫ້ເຂົ້າສູ່ຂະບວນການວຽກງານຕົວຈິງ ໃນແຕ່ລະປີ. ການຈັດຕັ້ງປະຕິບັດມະຕິກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI ໃນໄລຍະ 05 ປີ ຊຶ່ງເປັນການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ XI ຂອງພັກ ກໍ່ຄືການຜັນຂະຫຍາຍເນື້ອໃນກອງປະຊຸມສະຫຼຸບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ປະຈໍາປີ 2022 ແມ່ນຢູ່ໃນສະພາບແວດລ້ອມທີ່ປະເທດຊາດກຳລັງປະເຊີນໜ້າກັບຄວາມຫຍຸ້ງຍາກ ແລະ ສິ່ງທ້າທາຍໃນຫຼາຍດ້ານ ໂດຍສະເພາະແມ່ນບັນຫາຄວາມຫຍຸ້ງຍາກທາງດ້ານເສດຖະກິດການເງິນ ແລະ ອັດຕາເງິນເຟີ ແຕ່ເຖິງຢ່າງໃດກໍ່ຕາມ ພາຍໃຕ້ການນຳພາ-ຊີ້ນຳຂອງພັກ ແລະ ລັດຖະບານ ຈື່ງສາມາດຜ່ານຜ່າຄວາມຫຍຸ້ງຍາກຕ່າງໆໃນໄລຍະຜ່ານມາ ແລະ ເຖີງວ່າຈະຫຍຸ້ງຍາກປານໃດກໍ່ຕາມ ຄະນະຈັດຕັ້ງສູນກາງພັກກໍ່ໄດ້ ຕັດສິນໃຈ ເປີດກອງປະຊຸມວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງທົ່ວປະເທດ ປະຈໍາປີ 2022 ຂຶ້ນ ເພື່ອສະຫຼຸບຕີລາຄາຄືນຜົນການຈັດຕັ້ງປະຕິບັດວຽກງານໃນໄລຍະ 1 ປີຜ່ານມາ ພ້ອມທັງວາງທິດທາງແຜນການໃນຕໍ່ໜ້າ. ພ້ອມກັນນັ້ນ, ກອງປະຊຸມວຽກງານຈັດຕັ້ງທົ່ວປະເທດ ປະຈໍາປີ 2022 ຍັງໄດ້ຮັບຟັງບົດໂອ້ລົມຂອງ ສະຫາຍ ນາງ ສີໃສ ສືເດດມູນສອນ ກໍາມະການກົມການເມືອງ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ເພື່ອຊີ້ທິດໃຫ້ຄະນະພັກແຕ່ລະຂັ້ນນຳໄປຈັດຕັ້ງຜັນຂະຫຍາຍເປັນອັນລະອຽດເຂົ້າໃນການນຳພາ-ຊີ້ນຳ ວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງໃນຂັ້ນຂອງຕົນຮັບຜິດຊອບ ໃຫ້ມີປະສິດທິພາບ ແລະ ປະສິດທິຜົນ.

ທ່ານ ບຸນຍົງ ສີສຸພັນ ຄະນະພັກກະຊວງ ໄດ້ຂື້ນຜ່ານບົດສະຫຼຸບຕີລາຄາວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ປະຈໍາປີ 2022 ແລະ ທິດທາງໃນປີ 2023 ສະບັບເລກທີ 01/ຄພ.ພນ ໂດຍຍົກໃຫ້ເຫັນ ສະພາບລວມ ໃນການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ, ດ້ານອ່ອນ-ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້ ແລະ ທິດທາງແຜນການແຕ່ລະດ້ານ, ຊຶ່ງຄະນະພັກກະຊວງ ໄດ້ຖືເອົາວຽກງານກໍ່ສ້າງພັກທາງດ້ານການເມືອງ-ແນວຄິດ ເປັນວຽກຍຸດທະສາດສໍາຄັນ ທັງເປັນວຽກໜຶ່ງ ທີ່ສອດຫ້ອຍເຂົ້າໃນທຸກຂອດຂອງວຽກງານໃນການນໍາພາ; ໄດ້ເອົາໃຈໃສ່ສຶກສາອົບຮົມການເມືອງ ໃຫ້ສະມາຊິກພັກ-ພະນັກງານເປັນປົກກະຕິ ເຫັນໄດ້ວ່າສະມາຊິກພັກ-ພະນັກງານ ມີຄວາມຮັບຮູ້ ເຂົ້າໃຈ ແລະ ກໍາແໜ້ນບັນດາແນວທາງນະໂຍບາຍຂອງພັກ, ກົດໝາຍຂອງລັດ ສູງຂຶ້ນ, ມີທັດສະນະການເມືອງຖືກຕ້ອງ, ເຊື່ອໝັ້ນຕໍ່ອຸດົມການຂອງພັກ, ເປັນເຈົ້າການແກ້ໄຂບັນຫາທີ່ເກີດຂຶ້ນໄດ້ຜົນສໍາເລັດ, ຕັ້ງໜ້າປະຕິບັດໜ້າທີ່ການເມືອງທີ່ໄດ້ຮັບມອບໝາຍໃຫ້ມີປະສິດທິຜົນ.

ໃນກອງປະຊຸມ ຜູ້ເຂົ້າຮ່ວມຍັງໄດ້ຮັບຟັງການຜ່ານເອກະສານທີ່ສໍາຄັນຕ່າງໆ ເປັນຕົ້ນແມ່ນ ບົດສະຫຼຸບ ການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັກຕັ້ງ ປະຈໍາປີ 2022 ແລະ ທິດທາງໜ້າທີ່ ປີ 2022 ສະບັບເລກທີ 27/ຄຈສພ, ບົດໂອ້ລົມ ຂອງ ສະຫາຍ ນາງ ສີໃສ ລືເດດມູນສອນ ກໍາມະການສູນກາງພັກ ເລຂາທິການສູນກາງພັກ ຫົວໜ້າຄະນະຈັດຕັ້ງສູນກາງພັກ ຕໍ່ກອງປະຊຸມສະຫຼຸບວຽກງານກໍ່ສ້າງພັກ ພະນັກງານ ແລະ ປັບປຸງກົງຈັກການຈັດຕັ້ງ ທົ່ວປະເທດ ປະຈໍາປີ 2022, ມະຕິ ຂອງກົມການເມືອງສູນກາງພັກ ວ່າດ້ວຍການຕີລາຄາພະນັກງານ ສະບັບເລກທີ 21/ກມສພ, ມະຕິ ຂອງກົມການເມືອງສູນກາງພັກ ວ່າດ້ວຍການເລືອກເຟັ້ນ ແຕ່ງຕັ້ງ ສັບປ່ຽນໜ້າທີ່ຂອງພະນັກງານນໍາພາ-ຄຸ້ມຄອງ ສະບັບເລກທີ 13/ກມສພ ແລະ ຄໍາສັ່ງ ຂອງຄະນະເລຂາທິການສູນກາງພັກ ວ່າດ້ວຍການດໍາເນີນກອງປະຊຸມຄົບຄະນະກາງສະໄໝ ສະບັບເລກທີ 268/ຄຈສພ.

ນອກຈາກນີ້, ກອງປະຊຸມຍັງໄດ້ປະກາດການຈັດຕັ້ງກະຊວງພາຍໃນ ເພື່ອຈັດຕັ້ງປະຕິບັດວຽກງານພະນັກງານ ໃຫ້ເຂັ້ມງວດ ທັງຮັບປະກັນຄວາມຖືກຕ້ອງ ແລະ ເປັນເອກະພາບທາງດ້ານຫຼັກການ ແລະ ກົດເກນ ໃນການຄຸ້ມຄອງພະນັກງານ ທັງຮັບປະກັນລັກສະນະສືບຖອດປ່ຽນແທນ ແລະ ຍົກສູງຄຸນນະພາບຂອງວຽກງານ ໂດຍສະເພາະ ແມ່ນພະນັກງານທີ່ຈະອອກພັກຜ່ອນ ຮັບອຸດໜູນບໍານານ ຈໍານວນ 8 ທ່ານ ຍິງ 2 ທ່ານ, ການຍົກຍ້າຍ ແລະ ແຕ່ງຕັ້ງພະນັກງານຮັບໜ້າທີ່ໃໝ່ ປະກອບມີ ຮອງຫົວໜ້າກົມ 5 ທ່ານ ຍິງ 1 ທ່ານ, ຫົວໜ້າພະແນກ 6 ທ່ານ ຍິງ 1 ທ່ານ ແລະ ຮອງຫົວໜ້າພະແນກ 6 ທ່ານ ຍິງ 1 ທ່ານ.

ໃນໂອກາດນີ້ ທ່ານ ປອ ທອງຈັນ ມະນີໄຊ ກໍາມະການສູນກາງພັກ ເລຂາພັກກະຊວງ ລັດຖະມົນຕີກະຊວງພາຍໃນ ໄດ້ໂອ້ລົມຕໍ່ກອງປະຊຸມ ວ່າ ການພັກຜ່ອນບໍານານຖືເປັນກົດເກນ ແລະ ຫຼັກການໜຶ່ງໃນການຄຸ້ມຄອງພະນັກງານ ກໍຄື ເປັນການປະຕິບັດນະໂຍບາຍຕໍ່ຜູ້ທີ່ມີຜົນງານ ຄຸນງາມ ຄວາມດີ ຈາກການປະຕິບັດໜ້າທີວຽກງານໄລຍະຜ່ານມາ ຂໍໃຫ້ບັນດາສະຫານທີ່ຮັບບໍານານຮັກສາສຸຂະພາບໃຫ້ແຂງແຮງ ປະກອບສ່ວນໃນການສ້າງສາ ແລະ ພັດທະນາປະເທດຊາດ ໃຫ້ມີຄວາມຈະເລີນກ້າວໜ້າ, ການຍົກຍາຍ, ແຕ່ງຕັ້ງພະນັກງານກໍ່ເປັນວຽກງານໜຶ່ງໃນການຮັບປະກັນລັກສະນະສືບທອດ ປ່ຽນແທນ ຕໍ່ເນື່ອງໃນສະເພາະໜ້າ ແລະ ຍາວນານ ເປັນການຍົກສູງຄຸນນະພາບຂອງວຽກງານພະນັກງານ ແລະ ຖັນແຖວພະນັກງານນໍາພາ-ຄຸ້ມຄອງ ສືບຕໍ່ປະກອບສ່ວນສໍາຄັນເຂົ້າ ໃນການເຄື່ອນໄຫວວຽກງານ ຂະແໜງການພາຍໃນ ໃຫ້ມີປະສິດທິພາບ ແລະ ປະສິດທິຜົນ ໃຫ້ບັນດາສະຫາຍທີ່ໄດ້ຮັບການຍົກຍ້າຍ ແຕ່ງຕັ້ງໃຫ້ດໍາລົງຕໍາແໜ່ງໃໝ່ ຕ້ອງໄດ້ເອົາໃຈໃສ່ ຄົ້ນຄວ້າ ເຊື່ອມຊຶມແນວທາງນະໂຍບາຍຂອງພັກ ກົດໝາຍຂອງລັດໃຫ້ເລິກເຊິ່ງກວ່າເກົ່າ ປະຕິບັດໜ້າທີ່ໃນຄວາມຮັບຜິດຊອບຂອງຕົນໃຫ້ຫຼາຍກວ່າເກົ່າ ວຽກງານຍິ່ງໜັກ ແລະ ທ້າທາຍຫຼາຍກວ່າເກົ່າຮຽນຮູ້ໃຫ້ຫຼາຍກວ່າເກົ່າ ເພາະວ່າເຮົາມີຕໍາແໜ່ງໜ້າທີ່ວຽກງານໃໝ່ທີ່ຈະຕ້ອງໄດ້ສຶກສາຄົ້ນຄວ້າເລີກເຊິງຮອບດ້ານ.