ພິທີປະກາດການຈັດຕັ້ງ

ກະຊວງພາຍໃນ ໄດ້ຈັດພິທີປະກາດການຈັດຕັ້ງຂຶ້ນ ໃນວັນທີ 19 ທັນວາ 2024 ໂດຍການເປັນປະທານຂອງ ທ່ານ ນ. ທອງຈັນ ແກ້ວແສນຫອມ ຄະນະປະຈໍາພັກກະຊວງ, ມີຄະນະຫ້ອງການ, ກົມ, ສະຖາບັນ, ສູນ ແລະ ພະນັກງານ-ລັດຖະກອນ ຂອງ ກະຊວງພາຍໃນ ເຂົ້າຮ່ວມ.

ໃນພິທີທ່ານ ສຸດທະພອນ ອັກຄະວົງ ຮອງຫົວໜ້າກົມຈັດຕັ້ງ ແລະ ພະນັກງານ ໄດ້ຂຶ້ນຜ່ານດໍາລັດ ວ່າດ້ວຍການອະນຸມັດໃຫ້ ທ່ານ ນ. ຄໍາພູນ ແກ້ວສະຫວັນ ຜູ້ຊ່ວຍວຽກຄະນະນໍາ ກະຊວງພາຍໃນ ອອກພັກການ-ຮັບອຸດໜູນບໍານານ ແລະ ຜ່ານຂໍ້ຕົກລົງຂອງທ່ານ ລັດຖະມົນຕີ ກະຊວງພາຍໃນ ວ່າດ້ວຍການຍົກຍ້າຍ ແລະ ແຕ່ງຕັ້ງພະນັກງານ ສະບັບເລກທີ 918/ພນ, ລົງວັນທີ 18 ພະຈິກ 2024 ໂດຍໄດ້ແຕ່ງຕັ້ງ ຂັ້ນຫົວໜ້າພະແນກ ເປັນ ຮອງກົມ ຈໍານວນ 06 ທ່ານ ຍິງ 01 ທ່ານ, ແຕ່ງຕັ້ງ ຮອງຫົວໜ້າພະແນກ ເປັນ ຫົວໜ້າພະແນກ ຈໍານວນ 04 ທ່ານ ຍິງ 01 ທ່ານ, ແຕ່ງຕັ້ງ ວິຊາການ ເປັນ ຮອງຫົວໜ້າພະແນກ ຈໍານວນ 09 ທ່ານ ຍິງ 03 ທ່ານ ແລະ ຍົກຍ້າຍປ່ຽນໜ້າວຽກໃໝ່ຈໍານວນ 04 ທ່ານ ຍິງ 02 ທ່ານ.

ທ່ານ ນ. ທອງຈັນ ແກ້ວແສນຫອມ ຄະນະປະຈໍາພັກກະຊວງ ໄດ້ມີຄຳເຫັນໂອ້ລົມຕໍ່ພິທີວ່າ ພິທີປະກາດການຈັດຕັ້ງຂອງກະຊວງພາຍໃນ ໃນຄັ້ງນີ້ ເປັນອີກວາລະໜຶ່ງ ທີ່ມີຄວາມໝາຍສຳຄັນຢ່າງຍິ່ງ ເພາະເປັນການຢັ້ງຢືນເຖິງການປະຕິບັດຕາມທິດຊີ້ນຳຂອງພັກ ແລະ ລັດຖະບານ ໂດຍສະເພາະແມ່ນການຈັດຕັ້ງປະຕິບັດຕາມມະຕິ, ຄໍາສັ່ງ, ກົດໝາຍ, ດຳລັດ ແລະ ລະບຽບການກ່ຽວກັບວຽກງານພະນັກງານໃຫ້ເຂັ້ມງວດທັງຮັບປະກັນຄວາມຖືກຕ້ອງ ແລະ ເປັນເອກະພາບ. ເພື່ອຮັບປະກັນລັກສະນະສືບທອດປ່ຽນແທນ, ຕໍ່ເນື່ອງ ໃນສະເພາະໜ້າ ແລະ ຍາວນານ ເພື່ອຍົກສູງຄຸນນະພາບຂອງວຽກງານພະນັກງານ ແລະ ຖັນແຖວພະນັກງານນຳພາ-ຄຸ້ມຄອງ ສືບຕໍ່ປະກອບສ່ວນສຳຄັນເຂົ້າໃນການເຄື່ອນໄຫວວຽກງານຂະແໜງການພາຍໃນ ໃຫ້ມີປະສິດທິພາບ ແລະ ປະສິດທິຜົນ, ທ່ານຍັງໄດ້ເນັ້ນໃຫ້ ຜູ້ທີ່ໄດ້ຮັບການຍົກຍ້າຍ ແລະ ຮັບໜ້າທີ່ໃໝ່ຕ້ອງເພີ່ມທະວີເອົາໃຈໃສ່ຝຶກຝົນຫຼໍ່ຫຼອມຕົນເອງໃນທຸກດ້ານ, ປະຕິບັດໜ້າທີ່ວຽກງານໃນຄວາມຮັບຜິດຊອບຂອງຕົນໃຫ້ຫຼາຍຂຶ້ນກວ່າເກົ່າ.